اليك شپەكبايەۆ جاستاردىڭ مەملەكەتتىك قىزمەتكە قىزىعۋشىلىعى ارتقانىن ايتتى
اليك شپەكبايەۆ بۇگىندە جاستاردىڭ مەملەكەتتىك قىزمەتكە قىزىعۋشىلىعىنىڭ ارتقانىن ايتا وتىرىپ، «بىزگە شەت تىلدەردى مەڭگەرگەن، soft skills بار، كورپورتيۆتىك سەكتوردا تابىستى جۇمىس جاساي الاتىن شەتەلدەگى جوعارى وقۋ ورىندارىنىڭ تۇلەكتەرى، جاس ماماندار كەلە مە، قالاي ويلايسىزدار؟ » دەگەن ساۋال تاستادى.
جانە اتالعان ۆەدومستۆوداعى حالىقارالىق باعدارلامالار جانە سىرتقى بايلانىس باسقارماسىنىڭ ساراپشىسى بوس لاۋازىمىنا ورنالاسۋ بويىنشا وتكىزىلگەن كونكۋرستىڭ ناتيجەسىمەن ءبولىستى.
«ءبىر ورىنعا بارلىعى 28 سۇرانىم ءتۇستى. ۇمىتكەرلەر مەملەكەتتىك جانە ورىس ءتىلىن عانا مەڭگەرمەگەنىن اتاپ وتكىم كەلەدى. 9 ۇمىتكەر شەت تىلدەرىن (اعىلشىن، قىتاي، تۇرىك جانە ت. ب. ) جەتىك مەڭگەرگەن. ەكەۋى ماگيستراتۋرانى بىتىرگەن جانە التاۋىنىڭ جوعارى ءبىلىمى تۋرالى ەكى ديپلومى بار. ءۇش ۇمىتكەر وقۋدى شەتەلدە بىتىرگەن (ر ف، انگليا، تۇركيا). دارىندى جاس ازاماتتار!»، - دەپ جازدى اليك شپەكبايەۆ Facebook-تەگى پاراقشاسىندا.
ودان ءارى كونكۋرسقا قاتىسۋشىلارعا قويىلاتىن تالاپتارمەن تانىستىردى. مانساپتىق مودەل شەڭبەرىندە مەملەكەتتىك قىزمەتكە ىرىكتەۋ اشىق كونكۋرس نەگىزىندە جانە مەريتوكراتيا قاعيداتى بويىنشا جۇزەگە اسىرىلادى. ءاربىر ۇمىتكەر تەڭ جاعدايدا ءۇش ساتىلى ىرىكتەۋ جۇيەسىنەن وتەدى (زاڭنامانى ءبىلۋ جونىندەگى تەستىلەۋ، قۇزىرەتتىلىكتى باعالاۋ جانە سۇحبات، سونداي- اق تاياۋدان بەرى باسشىلىق لاۋازىمدارعا ورنالاسۋ ءۇشىن ەسسە جازۋ ەنگىزىلدى).
جازبا سوڭىندا جوعارىدا اتالعان قىزمەتكە كونكۋرس ناتيجەسى بويىنشا ساراپشى لاۋازىمىنا «بولاشاق» باعدارلاماسى بويىنشا ۇلى بريتانيادا ماگيستراتۋرانى بىتىرگەن ىسقاقوۆ ارمان تالعات ۇلىنىڭ تاعايىندالعانىن ايتتى.
«ءبىزدىڭ تاتۋ ۇجىمنىڭ جاڭا مۇشەسىنە تابىس جانە باسقا ۇمىتكەرلەرگە ساتتىلىك تىلەيمىن. مەن ءاربىرىڭىزدىڭ مەملەكەتتىك قىزمەتتە لايىقتى ورىن الاتىندارىڭىزعا سەنەمىن. ال، ازىرشە ءبىزدىڭ الداعى كونكۋرستار تۋرالى جاڭالىقتاردى باقىلاپ وتىرىڭىزدار»، - دەپ اياقتادى ءسوزىن ۆەدومستۆو باسشىسى.
اۆتور: داۋلەت ىزتىلەۋ
