مۋزارت ءانشىسى كەنجەبەك ەستۋ قابىلەتى تومەن بالالارعا ارناپ ورتالىق اشپاق

الماتى. قازاقپارات - الماتىدا ۇزدىك ءۇش الەۋمەتتىك جوبا اۆتورلارى ماراپاتتالدى.

جىلدا ۇيىمداستىرىلاتىن بايقاۋعا 18 جوبا ىرىكتەلىپ الىنعان، دەپ حابارلايدى قازاقپارات ءتىلشىسى.

«قازاقتا جاقسى ءسوز بار. جۇمىلا كوتەرگەن جۇك جەڭىل دەگەن. وسىنداي الەۋمەتتىك قايىرىمدىلىق جوبالاردىڭ ماڭىزى ارتىپ كەلەدى. ءبىزدىڭ باستى ماقساتىمىز - وسى جوبالاردى مەملەكەتكە كورسەتۋ، قوعامنىڭ نازارىن اۋدارۋ، سول ارقىلى الەۋمەتتىك تۇرعىدان مۇقتاج ادامداردى ءومىر ساپاسىن جاقسارتۋ بولىپ تابىلادى»، - دەدى «نۇر وتان» پارتياسى الماتىداعى فيليالى ءتوراعاسىنىڭ ءبىرىنشى ورىنباسارى جۇلدىز وماربەكوۆا.

ۇسىنىلعان 18 جوبانىڭ ىشىندە قۇپيا داۋىس بەرۋ ارقىلى 3 جوبا ۇزدىك دەپ تانىلدى.

اتاپ ايتقاندا، ءۇشىنشى ورىندى «ەرىكتىلەر قوزعالىسى الەمدى وزگەرتەدى» جوباسىنىڭ اۆتورلارى لەيلا بايراموۆا مەن ءامينا ەرمۇحامبەتوۆا يەلەندى. ولارعا كونكۋرس دەمەۋشىلەرى 500 مىڭ تەڭگە كولەمىندە سىيلىق بەردى.

ەكىنشى ورىندى مۋزارت ءانسامبلىنىڭ ءانشىسى كەنجەبەك ءجانابىلوۆتىڭ «ەل نازى» ارت-تەراپيا ورتالىعى جوباسى جەڭىپ الدى.

ءانشى ەستۋ قابىلەتى ناشار بالالاردىڭ شىعارماشىلىعىن دامىتۋعا مۇمكىندىك بەرەتىن ورتالىق اشپاقشى. ا. بايتۇرسىنوۆ پەن گوگول كوشەلەرىنىڭ قيىلىسىندا ورنالاسقان ورتالىققا دياگنوزى قويىلعان كەز- كەلگەن بالا كەلە الادى.

«ءبىزدىڭ ورتالىقتا ەستۋ قابىلەتى تومەن، كاحيليارلى يمپلانت سالىنعان بالالارمەن جۇمىس جاسالادى. مەن بۇل پروبلەمانى وزىمنەن وتكىزدىم. مەنىڭ ءوزىمنىڭ ۇلكەن ۇلىم قۇلاعى ەستىمەيتىن بولىپ دۇنيەگە كەلدى. ءبىز 7 جاسىنا دەيىن كوپ ۋاقىت سوزىپ ءجۇرىپ الدىق. ميىنا دىبىس كەلمەگەن سوڭ ادامنىڭ ميى ۇيىقتاپ قالادى ەكەن. كاحيليارلى يمپلانتتى 6,5 جاسىندا ورناتتىق. سودان باستاپ بالامىز مەكتەپكە باردى، اتتارىمىزدى ايتادى»، - دەدى كەنجەبەك ءجانابىلوۆ.

 

اتالعان ورتالىقتا ازىرگە 40 بالا ءبىلىم الاتىن بولادى. مۇندا سۋردوپەداگوگتار بالالاردى دومبىرا، ۆوكال ونەرىنە باۋليتىن بولادى.

جۇلدەلى ءبىرىنشى ورىندى «№1 -مامانداندىرىلعان الەۋمەتتىك كومەك كورسەتۋ ورتالىعى» مەملەكەتتىك كاسىپورنى «جەكە ءومىر ءسۇرۋ ءۇيى» جوباسىمەن جەڭىپ الدى.

اتالعان جوبانىڭ اۆتورى دانيپا ىسقاقوۆا ۇزدىك جۇمىسى ءۇشىن 1 ميلليون تەڭگە كولەمىندە سىيلىق الدى.

ايتا كەتۋ كەرەك، «جەكە ءومىر ءسۇرۋ ءۇيى» بىلتىر مامىردا اشىلعان بولاتىن. مۇندا 20 پسيحولوگيالىق- مەنتالدى اۋىتقۋى بار ادام جەكە وزدەرى ءومىر ءسۇرۋدى ۇيرەنىپ جاتىر. مامانداردىڭ ايتۋىنشا، وسى ادامداردىڭ 5 ى قازىر مەملەكەتتىك مەكەمەلەردە جۇمىس ىستەپ جاتىر. اتالعان ءۇي مۇمكىندىگى پسيحولوگيالىق ناۋقاستاردى الەۋمەتتىك قوعامعا بەيىمدەۋگە باعىتتالعان.