ەڭ تومەنگى جالاقىمەن زەينەتكەرلىككە شىققاندار قانشا اقشا الادى

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا زەينەتاقى قورىنا كوبىرەك اقشا جيناۋعا كەڭەس بەردى.

سەبەبى مينيمالدى جالاقىمەن زەينەتكەرلىككە شىققاندار اي سايىن 30-40 مىڭنان ارتىق المايدى، دەپ حابارلايدى قازاقپارات ءتىلشىسى.

«وكىنىشكە قاراي، بۇگىندە كەيبىر جۇمىس بەرۋشىلەر زەينەتاقى جارنالارىن اۋدارمايدى. ال جۇمىسشىلار ونى سۇرامايدى دا، ءوز بولاشاعىن ويلامايدى. ونداي ادامدار زەينەتاقى قورىنا جارنا اۋدارماسا، اقشا جيناماسا، مەملەكەتتەن زەينەتاقى الادى. ءبىراق ونىڭ مولشەرى كوپ ەمەس، ەڭ تومەنگى كۇنكورىس دەڭگەيىنىڭ 50 پروتسەنتى عانا، ول، شامامەن، 14 مىڭ تەڭگە»، - دەدى س. جاقىپوۆا ۇكىمەت ۇيىندە وتكەن باسپا ءسوز ءماسليحاتىندا.

ۆيتسە-مينيستر مينيمالدى جالاقىدان زەينەتاقى جارناسىن تولەپ، زەينەتكەرلىككە شىققان ازاماتتاردىڭ اقشاسىن دا ەسەپتەپ بەردى. ماسەلەن، جۇمىسشىنىڭ كەلىسىمشارتىندا ءبىر مينيمالدى جالاقىدان (28284 تەڭگە - بيىلعى كورسەتكىش) زەينەتاقى جارناسىن اۋدارۋ تۋرالى جازىلسا، وندا اي سايىن زەينەتاقى قورىنا 2824 تەڭگە ءتۇسىپ تۇرادى. 33 جىلدا 1118304 تەڭگە جينالادى. مەملەكەت ول ادامنىڭ زەينەتاقى جيناقتاۋ جۇيەسىنە قاتىسقانىن ەسكەرە وتىرىپ، بازالىق زەينەتاقىنىڭ تولىق مولشەرىن - 28 مىڭ تەڭگەنى تولەپ وتىرادى. «سوندا ون جىلدا بيۋدجەتتەن 3 ميلليوننان استام اقشا بولىنەدى. ال ونىڭ ءوزى جيناعان اقشانىڭ كولەمى 1 ميلليوننىڭ شاماسىندا. سوندا مەملەكەت حالىقتى توناپ وتىر ما؟ جوق، الدە، كەرىسىنشە، جاعداي جاساپ وتىر ما؟»، - دەپ اتاپ ءوتتى س. جاقىپوۆا.

ونىڭ سوزىنە قاراعاندا، بازالىق زەينەتاقىمەن بىرگە قورعا جيناعان اقشا دا اي سايىن تولەنىپ وتىرادى. 33 -جىلدىڭ ىشىندە قورداعى اقشانىڭ ۇستىنە سىياقى دا تۇسەدى. ال ونىڭ مولشەرى ينفلياتسيانىڭ دەڭگەيىنە قاراي رەتتەلىپ وتىرادى. وعان مەملەكەتتىڭ ءوزى كەپىلدىك بەرەدى.

ايتا كەتەيىك، بۇگىنگى باسپا ءسوز ءماسليحاتىندا سۆەتلانا قابىكەن قىزى زەينەتاقى تولەمدەرىن اۋدارۋ ءتارتىبىن ءتۇسىندىردى.

«قازىر الەۋمەتتىك جەلىلەردە قاراسام، «كولىك پەن پاتەر ساتۋدان زەينەتاقى جارناسىن ۇستايدى» دەپ جازىپ جاتىر. ولاي ەمەس. ونداي تابىستان زەينەتاقى جارنالارى ۇستالمايدى. سىزدەر جۇمىس ىستەۋ نەمەسە قىزمەت كورسەتۋ ارقىلى تابىس تاپساڭىز عانا زەينەتاقى جارناسى ۇستالادى. قازىر جۇمىس بەرۋشىلەر ونداي كەلىسىمشارتتاردى جاسايدى دا، زەينەتاقى جارنالارىن تولەمەي جۇرەدى»، - دەدى س. جاقىپوۆا.