فيرۋزا شاريپوۆانىڭ كەلەسى جەكپە- جەگىنىڭ ۋاقىتى بەلگىلى بولدى
2018 -جىلعى 8 - قىركۇيەكتە رەسەيدىڭ سانكت- پەتەربۋرگ قالاسىندا قازاقستاندىق بوكسشى فيرۋزا شاريپوۆا (8-1, 4 ك و) يسپانيالىق بوكسشى ميريام گۋتەررەسپەن رينگكە شىعادى.
«مەنىڭ ماقساتىم - كاسىبي بوكستا ءابسوليۋتتى چەمپيون اتانۋ. ول ءۇشىن بار مۇمكىندىگىمدى پايدالانامىن. ميريام گۋتەررەستىڭ تەحنيكاسى مىقتى، ول جىلدام ءارى كاسىبي بوكستا جەڭىلىپ كورمەگەن. گۋتەررەستى گونتاريۋكيگە قاراعاندا جەڭۋ وڭايعا سوقپايدى، سەبەبى دجەميللا گونتاريۋكي جۇدىرىقتاسقان كەزدە ءبىر ورنىندا كوپ تۇرىپ قالادى. ونىڭ ۇستىنە يسپانيالىق بوكسشىنىڭ بويى مەنەن ۇزىن جانە مەن باسقا سالماق دارەجەسىندە جۇدىرىقتاسامىن. سوعان قاراماستان مەن وزىمە جانە كومانداما سەنەمىن»، - دەدى فيرۋزا شاريپوۆا
فيرۋزا شاريپوۆانىڭ قارسىلاسى يسپانيالىق بوكسشى ميريام گۋتەررەس كاسىبي بوكستا 8 جەكپە- جەك وتكىزىپ، بارلىعىندا جەڭىسكە جەتكەن. كەزدەسۋدە WBO تيتۋلى ساراپقا سالىنادى.
سونىمەن قاتار فيرۋزا شاريپوۆا كەزەكتى كۇرەسىن دەنيس تەننىڭ رۋحىنا ارنايتىنىن اتاپ ءوتتى.
«فيرۋزا ءۇشىنشى سالماق دارەجەسىندە ونەر كورسەتكەلى وتىر. ەگەر ول جەڭىسكە جەتسە، ءۇش سالماق دارەجەسىندە چەمپيون اتانادى. وسىعان دەيىن قازاقستاننان ەشكىم مۇنداي جەتىستىككە جەتپەگەن. ال الەمدە مۇنداي جەتىستىككە جەتكەن سپورتشىلار از»، - دەدى بوكسشى مەنەدجەرى سەرگەي زاۆيلەيسكي.
ەستەرىڭىزگە سالا كەتەيىك، شاريپوۆانىڭ سوڭعى جەكپە- جەگى 2017 -جىلى 30 - جەلتوقساندا الماتى قالاسىندا ءوتتى. ول بەلگيالىق بوكسشى دجەميللا گونتاريۋكيدى (13-5-1, 2 ك و) جەڭىپ، WBC Silver جانە IBO تيتۋلدارىنا يە بولدى.
فوتو: fsk-promotion.com
اۆتور: داۋلەت ىزتىلەۋ
