كولىك پەن پاتەر ساتۋدان زەينەتاقى جارناسىن ۇستامايمىز - سۆەتلانا جاقىپوۆا

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى سۆەتلانا جاقىپوۆا جۋرناليستەردىڭ الدىنا شىعىپ، زەينەتاقى تولەمدەرىن اۋدارۋ ءتارتىبىن ءتۇسىندىردى. بۇعان دەيىن ول الەۋمەتتىك جەلىلەر ارقىلى بايلانىسقا شىققان بولاتىن، دەپ حابارلايدى قازاقپارات ءتىلشىسى.

«اتالعان ماسەلە مەنىڭ قۇزىرەتىمە جاتادى. ءوزىم ەڭبەك دەمالىسىندا بولدىم. سەنبى كۇنى بىردەن بايلانىسقا شىعا المادىم. سوندىقتان جەكسەنبى كۇنى فەيسبۋك ارقىلى تۇسىنىكتەمە بەرۋگە تىرىستىم»، - دەدى س. جاقىپوۆا ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، زاڭ جوباسى بىلتىردان بەرى ازىرلەندى. ءتارتىپ بويىنشا قوعامدىق تالقىلاۋعا دا سالىندى. وعان كاسىپكەرلەر، ساراپشىلار مەن قۇزىرەتتى مەملەكەتتىك ورگانداردىڭ وكىلدەرى قاتىستى. پارلامەنت دەپۋتاتتارى دا قارادى.

 «نەگىزى، «ازاماتتىق- قۇقىقتىق كەلىسىمشارتتار» دەپ العاندا، ءبىز جۇمىستار مەن قىزمەتتەدى تولىعىمەن قامتۋدى كوزدەدىك. سول سەبەپتى ءدال سونداي انىقتامانى الدىق. ماسەلەن، اقىلى قىزمەت كورسەتۋ كەلىسىمشارتى بار. تاسىمال سالاسىندا قىزمەت كورسەتۋ، كونسالتينگتىك جانە ماركەتينگتىك قىزمەتتەر جانە تاعى باسقا كەلىسىمشارتتار بولادى. ونداي كەلىسىمشارتتاردىڭ سانى 30 دان اسادى. ءبىز ونىڭ ءبارىن «ازاماتتىق- قۇقىقتىق كەلىسىمشارتتار» دەپ الدىق. ال زەينەتاقى جارناسىن ۇستاۋ ءتارتىبى مەن مەرزىمى ۇكىمەت قاۋلىسىمەن رەتتەلەدى. اتالعان ماسەلە زاڭدا دا كورسەتىلگەن. سوندىقتان زاڭدا كەلىسىمشارتتاردىڭ ناقتى اتاۋلارىن تاپتىشتەپ جازۋدىڭ قاجەتى جوق»، - دەپ اتاپ كورسەتتى س. جاقىپوۆا.

 وسى ورايدا ۆيتسە- مينيستر نەگىزسىز دالەلدەرگە سەنبەۋگە كەڭەس بەردى.

«قازىر الەۋمەتتىك جەلىلەردى قاراسام، «كولىك پەن پاتەر ساتۋدان زەينەتاقى جارناسىن ۇستايدى» دەپ جازىپ جاتىر. ولاي ەمەس. ونداي تابىستان زەينەتاقى جارنالارى ۇستالمايدى. سىزدەر جۇمىس جاساۋ، ءيا بولماسا، قىزمەت كورسەتۋ ارقىلى تابىس تاپساڭىز عانا زەينەتاقى جارناسى ۇستالادى. وكىنىشكە قاراي، قازىر جۇمىس بەرۋشىلەر ونداي كەلىسىمشارتتاردى جاسايدى دا، زەينەتاقى جارنالارىن تولەمەي جۇرەدى. جۇمىسشىلار بولسا، ونى تالاپ ەتپەيدى»، - دەدى س. جاقىپوۆا.

 ايتا كەتەيىك، بۇعان دەيىن سۆەتلانا قابىكەن قىزى الەۋمەتتىك جەلىلەر ارقىلى بايلانىسقا شىققان بولاتىن.

«بارلىق زەينەتاقى اۋدارىمدارى ازاماتتاردىڭ تاپقان تابىستارىنان عانا تولەنەدى. ماسەلەن، كاسىپورىن جۇمىسشىلارى ءۇشىن تاپقان تابىسى ونىڭ جالاقىسى، جەكە كاسىپكەر ءۇشىن - بۇل تىكەلەي كاسىپكەرلىك قىزمەتتەن الىنعان كىرىس، جەكە نوتاريۋستار ءۇشىن - بۇل ولار كورسەتكەن قىزمەتتەن تۇسكەن تابىس سانالادى. ال وتەماقىلى شارت (ازاماتتىق- قۇقىقتىق شارت دەپ اتالادى) نەگىزىندە زاڭدى نەمەسە جەكە تۇلعا ءۇشىن جۇمىستاردىڭ نەمەسە قىزمەتتەردىڭ بەلگىلى ءبىر ءتۇرىن ورىندايتىن ازاماتتار ءۇشىن مىندەتتى زەينەتاقى جارناسى اتالعان جۇمىستاردى نەمەسە قىزمەتتەردى (جەكە مۇلكىن ساتۋدان ەمەس) ورىنداۋ ناتيجەسىندە الىناتىن كىرىستەر تولەنەدى»، - دەپ جازدى ۆيتسە- مينيستر فەيسبۋكتەگى پاراقشاسىندا.

اۆتور: ارمان اسقاروۆ