قىتايدا «التىنەمەل» دەرەكتى فيلمى جۇلدەگە يە بولدى

استانا. قازاقپارات - ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» ا ق تۇسىرگەن «التىنەمەل» دەرەكتى فيلمى ق ح ر- نىڭ تايجوۋ قالاسىندا وتكەن كينو جانە تۋريزم سالاسىنداعى ازيالىق ونەر اپتالىعىندا «شەتەلدىڭ ۇزدىك دەرەكتى ءفيلمى» جۇلدەسىمەن ماراپاتتالدى، دەپ حابارلايدى قازاقپارات.

التىنەمەل مەملەكەتتىك ۇلتتىق ساياباعىنىڭ باي تابيعاتى تۋرالى باياندايتىن دەرەكتى ءفيلمنىڭ اۆتورى تانىمال فوتوگراف-ناتۋراليست ولەگ بەليالوۆ.

ايتا كەتسەك، «التىنەمەل» دەرەكتى ءفيلمى رەجيسسەردىڭ العاشقى جۇمىسى. سونداي-اق ولەگ بەليالوۆ بۇل كارتينانىڭ سەناري اۆتورى جانە قويۋشى وپەراتورى.

ەستەرىڭىزگە سالا كەتسەك، بىلتىر قاراشا ايىندا «قازاق فيلم» كينوستۋدياسى ق ر تۇڭعىش پرەزيدەنتى- ەلباسى قورىمەن بىرلەسىپ، قازاق دەرەكتى كينوسىنىڭ كۇندەرى اياسىندا «التىنەمەل» دەرەكتى ءفيلمنىڭ كورسەتىلىمى وتكەن بولاتىن.

كينو جانە تۋريزم سالاسىنداعى ازيالىق ونەر اپتالىعىنىڭ ۇيىمداستىرۋشىلارى: قىتايدىڭ تەليەۆيزيالىق سۋرەتشىلەر قاۋىمداستىعى، جىجياڭ باسپا، راديو، كينو جانە تەلەۆيزيا اكىمشىلىگى جانە تايجوۋ ۇكىمەتى. مادەني ءىس-شارا ازيا ەلدەرىندە تۋريزمنىڭ جانە كينەماتوگرافيا سالاسىنىڭ دامۋىنا باعىتتالعان. بيىل اتالعان شاراعا فرانسيا، رەسەي، قازاقستان جانە جاپونيا سىندى 23 مەملەكەتتەردەن مىڭنان استام كينو جانە تەلەباعدارلامالار قاتىسقان.

التىنەمەل - جەتىسۋ الاتاۋىنىڭ وڭتۇستىك سىلەمدەرىنىڭ اراسىندا ورنالاسقان ۇلتتىق تابيعي ساياباق. جەر كولەمى - 520 مىڭ گەكتار. ساياباق اۋماعىندا تۋريستەردى قاتتى قىزىقتىراتىن بىرەگەي تابيعي قۇرىلىمدار جانە بايىرعى تاريح ەسكەرتكىشتەرى ورنالاسقان. شاتقالدارىندا ەجەلگى ادامداردىڭ تاسقا قاشاپ سالعان سۋرەتتەرىن كورۋگە بولادى. قاپشاعاي مەملەكەتتىك اڭشىلىق شارۋاشىلىعى نەگىزىندە 1996 -جىلى قۇرىلدى.

ايتا كەتەرلىگى، ولەگ بەليالوۆ جاستايىنان جابايى تابيعاتتى، قۇستاردى تۇسىرۋگە اۋەستەنە باستادى. 1984-1987 -جىلدار ارالىعىندا «قازاق فيلم» كينوستۋدياسىندا وپەراتوردىڭ كومەكشىسى رەتىندە جۇمىس اتقاردى. سونداي-اق كوپتەگەن زوولوگيالىق ەكسپەديتسيالارعا، قازاقستان تابيعاتى تۋرالى فيلمدەردىڭ جانە فوتوالبومداردىڭ جاسالۋىنا بەلسەنە قاتىستى.