سوت حراپۋنوۆتاردىڭ قىلمىستىق ءىسىن دوعارۋ تۋرالى ءوتىنىشتى قاناعاتتاندىرمادى

الماتى. قازاقپارات - سۋديا ەرلى-زايىپتى حراپۋنوۆتاردىڭ قورعاۋشىلارى مەن باسقا دا سوتتالۋشىلاردىڭ قىلمىستىق ءىستى توقتاتۋ تۋرالى ارىزىن قاناعاتتاندىرمادى، دەپ حابارلايدى قازاقپارات ءتىلشىسى.

اتالعان ءىس الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىندا قارالىپ جاتىر.

بۇگىن سۋديا قاسىم قالماعامبەتوۆ قورعاۋشىلاردىڭ قىلمىستىق ءىستى توقتاتۋ تۋرالى ارىزىنا شەشىم شىعاردى.

«بۇل ءوتىنىش قاناعاتتاندىرىلمايدى. سەبەبى، جاپا شەككەن تاراپ ونىمەن كەلىسپەيدى. ءىس ماتەريالدارىن زەرتتەي كەلە ارىزدى قاناعاتتاندىرۋ قاجەتتىلىگى جوق دەپ شەشتىم»، - دەدى سۋديا قاسىم قالماعامبەتوۆ.

باس سوت تالقىلاۋى 6-7-8- تامىزعا بەلگىلەندى. سوت پروتسەسى اشىق جۇرەدى.

ايتا كەتۋ كەرەك، حراپۋنوۆ ءىسى بويىنشا 212 كۋاگەر تىڭدالادى. ءىس 400 تومنان تۇرادى.

مۇنىڭ الدىندا ۆيكتور مەن لەيلا حراپۋنوۆتى، ايار يلياسوۆتى سىرتىنان قاماۋعا الۋ تۋرالى بۇلتارتپاۋ شاراسى قابىلدانعان ەدى.

باسقا سوتتالۋشىلار ەشقايدا كەتپەۋى تۋرالى قولحاتپەن بوساتىلدى.

سوت قاۋلىسىنا سايكەس، ۆيكتور مەن لەيلا حراپۋنوۆتاردان وزگە سوتتالۋشىلار قۋاندىق بەكسۇلتانوۆ، التاي قاسىموۆ، ياكوۆ زاياتس، اباي ساپاروۆ، سەرىك ەسمۇحانوۆ، ايار يلياسوۆ، ايناكۇل سادىقبايەۆا، ابدۋل-عازيز مۇقاشيەۆ، ابىلايحان قارىمساقوۆ، عابيدەن قايىمسۇلتانوۆتىڭ ىستەرى قارالۋدا. ەرلى-زايىپتى حراپۋنوۆتار ۇيىمداسقان توپپەن بىرگە مەملەكەت مەنشىگىن ۇرلاۋ، لاۋازىمدىق وكىلەتتىكتى اسىرا پايدالانۋ، الاياقتىق، پارا الۋ، قىلمىستىق جولمەن الىنعان مۇلىكتى زاڭداستىرۋ باپتارى بويىنشا ايىپتالعان.

قىلمىستىق ارەكەتتەردەن مەملەكەتكە 250 ميلليون ا ق ش دوللارىنان استام شىعىن كەلگەن. ۆيكتور مەن لەيلا حراپۋنوۆتارعا، ايار يلياسوۆقا سىرتتاي قاماۋعا الۋ تۇرىندە بۇلتارتپاۋ شاراسى قولدانىلدى. قالعان تۇلعالاردان ەشقايدا كەتپەۋ تۋرالى قولحات الۋ شاراسى تىڭدالدى. سوت ىسىنە سۋديا قاسىم قالماعامبەتوۆ ءتوراعالىق ەتتى. الدىن الا تىڭداۋعا مەملەكەتتىك ايىپتاۋشى مەن سوتتالۋشىلاردىڭ قورعاۋشىلارى، جابىرلەنۋشىلەر قاتىستى.