قازاقستاندىق بيشىلەر حالىقارالىق فەستيۆالدان جۇلدەمەن ورالدى

استانا. قازاقپارات - قازاقستاندىق بيشىلەر بولگاريادا وتكەن حالىقارالىق ءبي فەستيۆالىنەن جۇلدەمەن ورالدى، دەپ حابارلايدى قازاقپارات ءتىلشىسى.

استانالىق «Nomad» ءبي ءانسامبلى بولگاريادا وتكەن «روزى وبزورى» حالىقارالىق ءبي فەستيۆال- كونكۋرسىندا 1- دارەجەلى ماراپاتقا يە بولدى.

اتالعان كونكۋرستا قۇرامى 40 جاس وسپىرىمنەن تۇراتىن ءبي ۇجىمى 8 حالىق ءبيىن ورىنداپ شىقتى.

جەڭىمپازداردى استانا اۋەجايىنان بيشىلەردىڭ جاقىن تۋىستارى مەن دوستارى قوشەمەتپەن قارسى الدى.

بيىلعى «روزى وبزورى» حالىقارالىق ءبي فەستيۆالىنە قازاقستان، وزبەكستان، رەسەي، بولگاريا، ۋكراينا، وڭتۇستىك وسەتيا جانە تاعى باسقا ەلدەردەن بيشىلەر قاتىستى. گران-پريدى رەسەي بيشىلەرى جەڭىپ الدى.

«بيىل گران-پري رەسەي قاتىسۋشىلارىنا بۇيىردى، بۇل ءبىزدى جىگەرلەندىردى، سەبەبى كەلەسى جىلى دايىندىقتى كۇشەيتىپ، ەڭبەكتەنىپ باس جۇلدەنى قولدان بەرمەۋگە تىرىسامىز. بۇدان بولەك «Nomad» ءبي ءانسامبلى قازاقستاننىڭ بولگارياداعى ديپلوماتيالىق ەلشىلىگىنىڭ ارنايى ماراپاتىنا يە بولدى، بۇل ءبىز ءۇشىن ۇلكەن قۇرمەت، ونىڭ ۇستىنە ەلشى ءوزى كەلىپ ءبي ۇجىمىمەن جۇزدەستى»، - دەدى «Nomad» ءبي ءانسامبلىنىڭ جەتەكشىسى ايناگۇل نۇرعازينا.

ايتا كەتەيىك، «روزى وبزورى» حالىقارالىق ءبي فەستيۆال-كونكۋرسى بولگاريادا قازاقستان مەن رەسەيدىڭ بولگاريا رەسپۋبليكاسىنداعى ەلشىلىكتەرىنىڭ قولداۋىمەن ۇيىمداستىرىلدى.