ارابتار «ناتو»- سى قۇرىلۋ مۇمكىن

استانا. قازاقپارات - ەستەرىڭىزدە بولسا، وسىدان ءبىرتالاي ۋاقىت بۇرىن سولتۇستىك اتلانت اسكەري اليانسىنا ۇقساس ارابتاردىڭ ءوز اسكەري وداعى قۇرىلۋى تۋراسىندا حاباردار ەتكەنبىز.

الايدا، اراب ەلدەرى اراسىنداعى الاۋىزدىق پەن باسەكەلەستىك جانە باسقا دا ساياسي فاكتورلارعا بايلانىستى بۇل وداقتىڭ قۇرىلماۋى مۇمكىن ەكەنىن دە ايتىپ وتكەن ەدىك. بۇل تاقىرىپ كۇن تارتىبىنە تاعى كوتەرىلدى.

 بۇل جولى ارابتاردىڭ ناتو قۇرىلىمىنا ۇقساس وداقتى قۇرۋعا ا ق ش مۇددەلىلىك تانىتىپ وتىر. بۇعان قوسا، ا ق ش بۇل وداقتىڭ قۇرىلۋىنا ءوزى تىكەلەي اتسالىسپاق. يزرايلگە قاۋىپ توندىرگەن يرانعا قارسى تۇرۋ ءۇشىن. دالىرەگى، اتالعان ايماقتاعى قاۋىپسىزدىكتى جەلەۋ ەتكەن مۇنداي وداق پارسى شىعاناعىنىڭ التى ەلى جانە مىسىر مەن يوردانيا اراسىندا قۇرىلۋى مۇمكىن.

 بۇل جايىندا Reuters اقپارات رەسۋرسى حابار تاراتتى.

 ا ق ش بيلىگى وسىلايشا تاياۋ شىعىس ەلدەرىنىڭ قورعانىس، اسكەري جاتتىعۋ، تەرروريستەرگە قارسى وپەراتسيا، سونداي- اق، ەكونوميكا جانە ديپلوماتيا سالالارى بويىنشا تىعىز قاتىناس ورناتقانىن قالايدى. وسى جىلدىڭ قاراشا ايىنىڭ 12-13- ءى كۇندەرى ۆاشينگتون قالاسىندا ءوتۋى ءتيىس سامميتتە تاياۋ شىعىس ستراتەگيالىق اليانسىن قۇرۋ ماسەلەسى قاراستىرىلۋى مۇمكىن. بۇل باعىتتا اق ءۇي ساراپشىلارى ايماقتاعى بيلىك وكىلدەرىمەن اتالعان اليانستىڭ جوباسى مەن كونتسەپتسياسىن جاتپاي- تۇرماي ازىرلەۋگە كىرىسكەن.

 ساراپشىلاردىڭ پايىمداۋىنشا، سۇننيتتىك مەملەكەتتەر سوعىس ءجۇرىپ جاتقان شام جەرىندەگى جانە يەمەندەگى داعدارىسقا قاتىستى مۇددەسى ءبىر ارنادان تابىلىپ وتىر. ولار الەمدىك مۇناي قورىنىڭ ەداۋىر بولىگى تاسىمالداناتىن پارسى شىعاناعىنداعى كەمە قاتىنايتىن ءدالىزدى بىرىگىپ قورعاي الادى. الايدا، اتالعان ايماق بويىنشا اسا ءىرى امەريكالىق اسكەري بازالار ورنالاسقان ساۋديانىڭ، بىرىككەن اراب امىرلىكتەرىنىڭ جانە كاتاردىڭ اراسىنداعى ءوزارا باسەكەلەستىك بۇل باستامانىڭ قۇرىلۋىنا كەدەرگى بولۋدا. ال بۇل باستاماعا يران بيلىگى نە دەيدى؟ «تاياۋ شىعىستاعى قاۋىپسىزدىكتى قامتاماسىز ەتۋ جەلەۋىمەن قۇرىلۋى مۇمكىن اسكەري اليانس ايماقتاعى احۋالدى ودان سايىن اسقىندىرادى»، - دەپ مالىمدەدى. يران بيلىگى.

http://islam.kz/kk