نۇرلان نوعايەۆ: اكىمدىكتەر حالىقتىڭ ءومىرىن جاقسارتۋ ءۇشىن بارىنشا ەڭبەكتەنۋى ءتيىس
اتىراۋ وبلىسى وڭىرلىك كوممۋنيكاتسيالار قىزمەتىنىڭ حابارلاۋىنشا، ازعىر وڭىرىنە ساپارىنىڭ ەكىنشى كۇنى نۇرلان نوعايەۆ ءبىرقاتار الەۋمەتتىك وبەكتىلەردى ارالاپ، اسان، قوڭىرتەرەك، قوياندى، جالعىزاپان جانە باتىربەك اۋىلدارىندا جەرگىلىكتى تۇرعىندارمەن كەزدەستى. ءوڭىر باسشىسى شالعايداعى ەلدى مەكەندەردى اۋىز سۋمەن قامتاماسىز ەتۋ - جەرگىلىكتى اتقارۋشى ورگانداردىڭ الدىندا تۇرعان ءبىرىنشى كەزەكتەگى مىندەت ەكەنىن باسا ايتىپ، جەكە توقتالدى.
«ءبىزدىڭ مىندەتىمىز - تۇرعىنداردىڭ ءومىرىن جاقسارتۋ ءۇشىن بارلىق جاعدايدى جاساۋ، قولدا بار بارلىق قۇرالداردى پايدالانۋ. بۇل پروتسەسكە بارلىق مەملەكەتتىك ورگاندار قىزمەتكەرلەرى، قوعامدىق ينستيتۋتتار، بارلىق دەڭگەيدەگى ءماسليحاتتار تارتىلۋى ءتيىس. اكىمدىكتەر جەرگىلىكتى جەرلەردە بىزگە جوبالاردى ۇسىنۋى ءتيىس. جەرگىلىكتى تۇرعىنداردىڭ ءۇمىت- ارمانىن، قانداي دا ءبىر ەلدى مەكەندى جاقسارتۋ ءۇشىن نەنىڭ جەتىسپەيتىنىن بارىنەن بۇرىن سىزدەر جاقسى بىلەسىزدەر. وكىنىشكە قاراي، كەي اۋدانداردا جۇمىستىڭ بۇل تەتىگى تولىق ىسكە اسپايدى. اكىمدەر، دەپۋتاتتار، قوعام قايراتكەرلەرى وسى ىسكە قاتىسۋى ءتيىس. جاقسى جوبالارعا ءبىز بارلىق ۋاقىتتا قاراجات تابامىز. سىزدەردىڭ مىندەت - ونى جەتكىزۋ»، - دەدى ن. نوعايەۆ.
ازعىر ءوڭىرىنىڭ تۇرعىندارىن 2020 -جىلعا دەيىن وڭىرلەردى دامىتۋ باعدارلاماسى اياسىندا ساپالى اۋىز سۋمەن قامتاماسىز ەتۋ ءۇشىن سۋمەن جابدىقتاۋ وبەكتىلەرىن رەكونسترۋكتسيالاۋ، قۇرىلىسىن سالۋ جانە جاڭعىرتۋ بويىنشا شارالار قابىلدانۋدا.
سونداي- اق، ولاردىڭ قاتارىنا قازىرگى ۋاقىتتا قوياندى توپتىق سۋ قۇبىرى ارقىلى اۋىز سۋمەن قامتىلىپ وتىرعان ازعىر ءوڭىرىنىڭ 7 ەلدى مەكەنى كىرەدى (ازعىر، بالقۇدىق، باتىربەك، سۇيىندىك، جالعىزاپان، قوڭىرتەرەك، ەگىنقۇدىق) . اسان، ءۇشتاعان ەلدى مەكەندەرىنە اۋىز سۋ جەتكىزۋ ءۇشىن جوبالىق- سمەتالىق قۇجاتتاما جاسالىپ جاتىر. قوشالاق جانە نيەتباي اۋىلدارى جەر استى سۋىن پايدالانىپ، اۋىز سۋمەن قامتاماسىز ەتىلۋدە.
اۆتور: اباي ابىلاي ۇلى
