ەردوعان: ا ق ش ماڭىزدى سەرىكتەسىنەن ايىرىلۋى مۇمكىن

استانا. قازاقپارات - تۇركيا پرەزيدەنتى رەجەپ تايىپ ەردوعان ا ق ش پرەزيدەنتى دونالد ترامپتىڭ تۇركيادا ەكى جىلدان بەرى ءۇيقاماقتا وتىرعان امەريكالىق پاستور ەندريۋ برانسوندى بوساتۋ جونىندەگى تالابىنا جاۋاپ بەردى.

ەردوعان وڭتۇستىك افريكا رەسپۋبليكاسىنا بارعان ساپارىندا جۋرناليستەر سۇراعىنا جاۋاپ بەرىپ، «امەريكا ماڭىزدى ارىپتەسىن جوعالتۋى مۇمكىن» دەپ مالىمدەدى. ول سونىمەن بىرگە Washington Post گازەتىندە جاريالانعان دونالد ترامپ ءوزىنىڭ ءوتىنىشى بويىنشا يزرايلدەن تەرروريزممەن ايىپتالعان تۇرىك ازاماتىن بوساتۋدى سۇراعانىن دا راستادى. ءبىراق ول ترامپقا جاۋاپ رەتىندە برانسوندى بوساتامىن دەگەن ءسوزىن جوققا شىعاردى.

ۆاشينگتون بريۋسسەلدە وتكەن سوڭعى سامميتتە تاراپتار وسىنداي كەلىسىمگە كەلدى دەپ تۇسىنگەن. ترامپتىڭ ءوتىنىشى بويىنشا يزرايل حاماس توبىنا جاردەم كورسەتتى دەپ ايىپتالعان، 27 جاستاعى ەبرۋ وزكاندى بوساتىپ، ەلىنەن شىعارعان. ءبىراق برانسوننىڭ سوت ءىسى قىسقارتىلعان جوق.

26 - شىلدەدە پرەزيدەنت دونالد ترامپ ەگەر تۇركيا امەريكالىق پاستوردى بوساتپاسا، ۆاشينگتون انكاراعا «ۇلكەن سانكسيالار» سالادى دەپ ەسكەرتكەن.

«ول ابدەن قينالدى. ءدىن جولىنداعى بەيكۇنا ادام دەرەۋ بوساتىلۋ كەرەك» دەپ جازدى ترامپ Twitter- دەگى پاراقشاسىنا.

تۇركيادا 20 جىلدان استام ۋاقىت تۇرىپ كەلە جاتقان حريستيان پاستورى ەندريۋ برانسون 2016 -جىلدىڭ قازان ايىندا يزمير شاھارىندا قاماۋعا الىنىپ، وعان «تەرروريزم مەن تىڭشىلىق» ءىسى بويىنشا ايىپ تاعىلعان. تۇرىك بيلىگى ونى ا ق ش- تا تۇراتىن تۇرىك ءدىني ۋاعىزشىسى فەتحۋللاح گۇلەننىڭ ادامدارىنا جاردەم بەرگەن جانە كۇرد جىكشىلدەرىن قورعادى دەپ ايىپتايدى. ەگەر سوت ونى كىنالى دەپ تاپسا، ول 35 جىلعا دەيىن باس بوستاندىعىنان ايىرىلۋى مۇمكىن. وزىنە تاعىلعان ايىپتاردى مويىندامايتىن پاستور برانسون 25 - شىلدەدە تەرگەۋ اباقتىسىنان ءۇيقاماققا شىعارىلعان.

www.azattyq.org