قازاقستاندا ۇ ب ت- نى قايتا تاپسىراتىنداردان ءوتىنىش قابىلدانۋدا
ق ر ءبىلىم جانە عىلىم ءمينيسترىنىڭ 2017 -جىلعى 2 - مامىرداعى №204 بۇيرىعىمەن بەكىتىلگەن «ۇلتتىق ءبىرىڭعاي تەستىلەۋدى جانە كەشەندى تەستىلەۋدى وتكىزۋ قاعيدالارىنا» سايكەس شەكتى بالدى الماعان، ناتيجەلەرى جويىلعان تۇلەكتەر جانە ۇلتتىق ءبىرىڭعاي تەستىلەۋ (بۇدان ءارى - ۇ ب ت) جانە كەشەندى تەستىلەۋگە (بۇدان ءارى - ك ت) قاتىسپاعان ادامدارعا ج و و- عا اقىلى نەگىزدە ءتۇسۋ ءۇشىن 2018 -جىلدىڭ 15-19- تامىز ارالىعىندا قايتا ۇ ب ت جانە ك ت وتكىزىلەدى.
ۇلتتىق تەستىلەۋ ورتالىعى حابارلاعانداي، ءوتىنىش قابىلداۋ 25 - شىلدە مەن 3 - تامىز ارالىعىندا ج و و- لاردىڭ قابىلداۋ كوميسسيالارىندا جۇرگىزىلەدى.
قايتا ۇ ب ت جانە ك ت تۇسۋشىلەردىڭ قالاۋى بويىنشا قازاق، ورىس نەمەسە اعىلشىن تىلىندە قازاقستان تاريحى، ماتەماتيكالىق ساۋاتتىلىق، وقۋ ساۋاتتىلىعى (وقۋ ءتىلى) جانە ەكى بەيىندىك ءپان بويىنشا وتكىزىلەدى. قايتا ۇ ب ت جانە ك ت اعىلشىن تىلىندە تاپسىرۋشىلار «قازاقستان تاريحى» ءپانىن ءوز قالاۋى بويىنشا قازاق نەمەسە ورىس تىلدەرىندە تاپسىرادى.
«قايتا ۇ ب ت جانە ك ت تاپسىراتىن تالاپكەرلەر ءبىلىم بەرۋ گرانتىنا ۇمىتكەر بولا المايدى جانە بۇعان دەيىن تاپسىرعان ەمتيحان ناتيجەسى ەسەپكە الىنبايدى. ولارعا شەكتىك دەڭگەيدى جيناي الماعانى ءۇشىن، اقىلى نەگىزدە وقۋعا تۇسۋگە قايتا تاپسىرۋ مۇمكىندىگى بەرىلىپ وتىر. قايتا ۇ ب ت، ك ت تاپسىرۋ اقىلى تۇردە جۇزەگە اسىرالادى. تەستىلەۋگە قاتىسۋ ءۇشىن تولەم 2242 تەڭگە. ونى قازپوشتا نەمەسە حالىق بانكىنىڭ بولىمشەلەرى ارقىلى تولەۋگە بولادى»، - دەدى ق ر ب ع م ۇلتتىق تەستىلەۋ ورتالىعىنىڭ ديرەكتورىنىڭ ورىنباسارى قۋانىشبەك مالىكوۆ.
سونىمەن قاتار جەدەلدەتىلگەن وقۋ مەرزىمىمەن قىسقارتىلعان ءبىلىم بەرۋ باعدارلامالارى بويىنشا ۇقساس ماماندىقتارعا ءتۇسۋ ءۇشىن كوللەدج بىتىرۋشىلەرى قايتا ۇ ب ت جانە ك ت ءوز قالاۋىمەن قازاق نەمەسە ورىس تىلىندە جالپى بەيىندىك جانە بەيىندىك پاندەر بويىنشا تاپسىرادى.
تەستىلەۋگە قاتىسۋعا ءوتىنىش بەرۋ ءۇشىن جوعارى وقۋ ورىندارىنىڭ قابىلداۋ كوميسسياسىنا ءوتىنىش، جالپى ورتا، تەحنيكالىق جانە كاسىپتىك (باستاۋىش جانە ورتا كاسىپتىك، ورتا بىلىمنەن كەيىنگى) نەمەسە جوعارى ءبىلىم تۋرالى قۇجات، تولەمنىڭ تۇبىرتەگى، 2 فوتوسۋرەت، مەديتسينالىق انىقتاما، جەكە كۋالىكتىڭ كوشىرمەسىن تاپسىرادى.
ايتا كەتەيىك، ءبىلىم بەرۋ گرانتىن بەرۋگە ارنالعان كونكۋرس 27 - شىلدە مەن 5 - تامىز ارالىعىندا وتكىزىلەدى. گرانت يەگەرلەرىنىڭ ءتىزىمى ۇلتتىق تەستىلەۋ ورتالىعىنىڭ testcenter.kz سايتىندا جاريالانادى. نەمەسە Telegram جەلىسىندە @testcenterBot ارقىلى بىلۋگە بولادى.
اۆتور: داۋلەت ىزتىلەۋ
