باياناۋىلدا ءماشھۇر ءجۇسىپتىڭ ءوزى جازعان قولجازبالارى كورسەتىلدى
الماتىدان اكەلىنگەن جازبالار ءماشھۇر ءجۇسىپتىڭ مۋزەيى مەن ەسكەلدى شاتقالىندا قويىلدى. جۇرتشىلىق نازارىنا سيرەك كەزدەسەتىن 14 قۇجات كورسەتىلدى.
«ءماشھۇر ءجۇسىپتىڭ ەڭبەكتەرى بار كىتاپتاردىڭ كەيبىرى جازۋشىنىڭ كوزى ءتىرى كەزىندە جارىق كورگەن. بۇل كىتاپتار وتكەن عاسىردىڭ باسى مەن ورتاسىندا تىركەلگەن»، - دەيدى ۇلتتىق عىلىم اكادەمياسى ورتالىق كىتاپحاناسىنىڭ قىزمەتكەرى گۇلشات ابىكوۆا.
مۋزەيدە وتكەن كورمەگە جازۋشىنىڭ ۇرپاقتارى دا قاتىستى. ولاردىڭ اراسىندا ءوزىنىڭ ۇلى باباسىنىڭ ءىسىن جالعاستىرىپ جۇرگەندەر دە بار.
- ءماشھۇر ءجۇسىپ ءوز جازبالارىندا ەسكى اراب جازباسىن قولدانعان، - دەيدى جازۋشىنىڭ شوبەرەسى نارتاي ءجۇسىپوۆ.
- قازاقستاندا بۇل كىتاپتاردى اۋداراتىن ادامدار وتە از. مەن ون جاسىمنان وسى جازبانى مەڭگەرە باستاعانمىن جانە ءومىر بويى اتامىزدىڭ قولجازبالارىن اۋدارۋمەن اينالىسىپ كەلەمىن. ونىڭ كەيبىرەۋلەرى 500-600 بەتتەن تۇرادى».
ءماشھۇر ءجۇسىپ كوپەي ۇلى 1858 -جىلى پاۆلودار وبلىسى، باياناۋىل اۋدانىندا تۋعان. ۇلى ويشىل، فولكلورتانۋشى، ەتنوگراف، تاريحشى، فيلوسوف، قازاق مادەنيەتى مەن ادەبيەتىنىڭ بەلگىلى تۇلعاسى. اراب جانە پارسى تىلدەرىن جەتىك مەڭگەرگەنىمەن قويماي، كوپ ءتىلدى بىلگەن عۇلاما. ول ولەڭ جازۋمەن قاتار، اۋىز ادەبيەتى ۇلگىلەرىن جيناپ باستىرۋمەن دە اينالىسقان. شەجىرەلەر مەن ايتىستاردى، كوپتەگەن تاريحي جىرلاردى حاتقا ءتۇسىرىپ، كەيىنگى ۇرپاققا اماناتتادى. سونىمەن بىرگە، ول كۇللى عۇمىرىن قازاق حالقىن ساۋاتتاندىرۋعا جۇمساعان. 10-15 جاسىنان باستاپ- اق ولەڭ جازىپ، حات جازارلىق بولعاننان-اق ءماشھۇر ءجۇسىپ حالىق ادەبيەتىن ەل اۋزىنان دا، قاعاز بەتىنەن دە جيناۋمەن اينالىسادى.
فوتو: pavlodarnews.kz
