برازيليادا نەيماردىڭ سۋرەتى جابىستىرىلعان ەسىرتكى قاپتارى تاركىلەندى

استانا. قازاقپارات - برازيليادا ءىرى قىلمىستىق توپ قولعا ءتۇستى. ەسىرتكى ساۋداسىمەن اينالىسىپ كەلگەن كۇدىكتىلەر ءبىر تونناعا جۋىق كوكايندى ساتپاقشى بولعان. پوليتسيا نازارىنان سىتىلىپ كەتۋدى كوزدەگەن قاراقشىلار ءار قاپتىڭ سىرتىنا تانىمال برازيليالىق فۋتبولشى نەيماردىڭ سۋرەتىن جابىستىرعان.

ودان بولەك ريو- دە- جانەيرو مەن برازيليا قالالارىندا تانىمال فۋتبولشىلارمەن كەزدەسۋ ۇيىمداستىرامىز دەپ قاراپايىم حالىقتىڭ قالتاسىن قاعىپ كەلگەن الاياقتار ۇستالدى. برازيليالىقتار ءۇشىن فۋتبولدىڭ ورنى ەرەكشە. الەم چەمپيوناتى كەزىندە جانكۇيەرلەر ءاربىر ويىندى تەلەديداردان تاپجىلماي تاماشالادى. دەگەنمەن مۋنديال اياقتالا سالىسىمەن، وعان قاتىستى داۋلار انىقتالا باستادى. جاقىندا عانا پوليتسيا قىزمەتكەرلەرى تىنىق مۇحيتىنان كوكاين تاسىمالداپ بارا جاتقان سۋاستى قايىقتارىن ۇستادى. تاركىلەنگەن ءبىر تونناعا جۋىق ەسىرتكىنىڭ ءاربىر قابىنا تانىمال برازيليالىق فۋتبولشى نەيماردىڭ سۋرەتى شاپتالعان.

سيلبي كوشتا، برازيليا ەسىرتكى باقىلاۋ پوليتسياسىنىڭ قىزمەتكەرى:

 - بۇل جۇك تاسىمالىن برازيليا- كولۋمبيانىڭ قىلمىستىق توبى ۇيىمداستىرعانى بەلگىلى بولدى. نەيماردىڭ فوتوسۋرەتىن ءازىل ءۇشىن قويسا كەرەك. ءبىراق، مەنىڭ ويىمشا، بۇل ماركەتينگ ءۇشىن جاسالعان. سەبەبى بۇگىندە نەيمار -  تانىمال فۋتبول جۇلدىزى. ودان بولەك ءتارتىپ ساقشىلارى ۇلكەن سپورتتى پايدالانىپ ولجالى بولعىسى كەلگەن الاياقتاردى دا قولعا ءتۇسىردى.

 اككى ساۋداگەرلەر ينتەرنەت ارقىلى تانىمال فۋتبولشىلاردىڭ قولتاڭباسى قويىلعان جەيدەلەردى ساتىلىمعا شىعارعان. ءتىپتى فۋتبولدان الەم چەمپيوناتىنىڭ كۋبوگىن 15 مىڭ دوللارعا جالعا بەرۋ تۋرالى ۇسىنىس تا بار. «سونداي- اق ولار 10 مىڭ دوللارعا كەز كەلگەن فۋتبول جۇلدىزىمەن 3 ساعاتتىق كەزدەسۋ ۇيمداستىرامىز» دەپ جالعان حابار تاراتقان. ولاردىڭ تىزىمىندە نەيمار، رونالدۋ، گريزمانن جانە ارتەم دزيۋبا دا بار. الاياقتار جانكۇيەرلەردەن بۇل قىزمەتتىڭ تولەمىن الدىن الا 100 پايىز وتەۋىن تالاپ ەتكەن.

 ادريانو كريلە، الاياقتار توبىنان زارداپ شەگۋشى:

- بالامنىڭ تۋعان كۇنىنە ەلىمىزدىڭ باس باپكەرى تيتەنىڭ قولتاڭباسى قويىلعان دوپتى ساتىپ الدىم. ولاردىڭ شوتىنا 270 دوللاردى اۋداردىم. تاۋار ءۇش كۇننىڭ ىشىندە كەلەدى دەپ ۋادە بەردى. مىنە، ءبىر اپتا ءوتتى، تاپسىرىسىم ءالى كەلمەدى. ەستۋىمشە، نەيماردىڭ جەيدەسىن الۋ ءۇشىن مىڭ دوللار سالعاندار دا بار ەكەن. ال ريونىڭ ءبىر تۇرعىنى كۋبوكتى جالعا الماق بولىپ الاياقتاردىڭ شوتىنا 20 مىڭ دوللار سالعان.

 تاعى ءبىر قىلمىستىق توپ برازيليالىق فۋتبول قۇراماسىنىڭ ويىنشىلارى ماريانو، پاۋلينو جانە ديەگو سوۋزانىڭ ۇيلەرىن توناماق بولعان. پوليتسيا قىزمەتكەرلەرى ءبىر توپ قاراقشىنى قولعا ءتۇسىردى. تۇتقىندالعانداردىڭ ايتۋىنشا، ولار وسى ارەكەتى ارقىلى سۇيىكتى كوماندالارىن الەم چەمپيوناتىندا جەڭىلىپ قالعانى ءۇشىن جازالاماق بولعان. ال قولدى قىلعان زاتتار مەن اقشالارىن كەدەي- كەپشىككە تاراتىپ بەرۋدى جوسپارلاعان.

www.24.kz