كەپىلگە قويىلعان پاتەرلەردى جالعا الۋعا بولادى - ۇلتتىق بانك
قارجى رەتتەۋشىسى سالىمشىلاردىڭ مۇمكىندىگىن ەسكەرىپ، وسىنداي قادامعا بارىپ وتىر. ساراپشىلار 2017 -جىلى ەلدەگى ەكونوميكالىق احۋالدى سارالاي كەلە يپوتەكالىق نەسيە العانداردى ەكى توپقا ءبولىپ قاراعان.
ءبىرىنشىسى شەتەل ۆاليۋتاسىمەن نەسيە العاندار، ەكىنشىسى يپوتەكانى قايتا قارجىلاندىرۋ باعدارلاماسىنا قاتىسقانىمەن تولەم قابىلەتى تومەن بورىشكەرلەر. ۇلتتىق بانك ناۋرىز ايىندا بۇل باعدارلاماعا وزگەرىس ەنگىزىپ، 2016 -جىلى شەتەل ۆاليۋتاسىمەن يپوتەكا راسىمدەگەندەردىڭ نەسيەسىن 2015 -جىلعى تەڭگە باعامىنا اۋىستىرۋ جونىندە شەشىم قابىلداعان بولاتىن.
بۇل باعدارلاما 2026 -جىلعا دەيىن ۇزارتىلدى. ءبىراق باعدارلاما بويىنشا قايتا قارجىلاندىرۋعا ءوتىنىش وسى جىلدىڭ 15- جەلتوقسانىنا دەيىن عانا قابىلدانادى. ەندى ۇلتتىق بانك تابىسى تومەن تۇرعىندار ءۇشىن تاعى ءبىر ءتيىمدى جاعداي قاراستىرىپ وتىر.
«ۇلتتىق بانك ەكىنشى دەڭگەيلى بانكتەرگە كەپىلگە قويىلعان پاتەرلەردى باسپاناعا مۇقتاج ادامدارعا جالعا بەرۋگە رۇقسات ەتتى. بۇل وزگەرىس 1- شىلدە كۇنى كۇشىنە ەنگەن. قازىر ونىڭ مەحانيزمى ويلاستىرىلىپ جاتىر. ەگەر سالىمشى كەپىلگە قويىلعان پاتەردىڭ اي سايىنعى اقىسىن تولەپ بىتسە، وندا پاتەر سول ادامنىڭ مەنشىگىنە وتەدى. بۇل باعدارلاماعا تەك باسپاناسىن بانككە كەپىلگە قويعان تۇرعىندار عانا قاتىسا الادى»، - دەدى ق ر ۇ ب تۇرعىنداردىڭ قارجىلىق ساۋاتىن ارتتىرۋ ءبولىمىنىڭ باسشىسى مينيسا حۋسنۋتدينوۆا.
