ماماندار بۋراباي تاۋلارىندا تۇندە جۇرمەۋگە كەڭەس بەردى

كوكشەتاۋ. قازاقپارات - سينيۋحا (كوكشەتاۋ) تاۋىنداعى وقيعادان كەيىن اقمولا وبلىسىنىڭ تۋريستىك اقپارات ورتالىعى مەن وڭىردەگى تۋروپەراتورلار دەمالۋشىلاردى تاۋعا شىققاندا اباي بولۋعا شاقىردى، دەپ حابارلايدى قازاقپارات ءتىلشىسى.

«سىزدەردەن تاۋدا قاۋىپسىزدىك ەرەجەلەرىن ساقتاۋلارىڭىزدى سۇرايمىز. دايىندالعان گيدپەن توپپەن بىرگە جۇرىڭىزدەر.. . ءوز بەتتەرىڭىزبەن تاۋعا كوتەرىلمەڭىزدەر، بۇل ومىرلەرىڭىز ءۇشىن اسا قاۋىپتى!»، - دەدى اقمولا وبلىستىق تۋريستىك اقپارات ورتالىعىنىڭ قىزمەتكەرى.

«بۋراباي دامۋ» ج ش س دا تۋريستەرگە ءوز ومىرلەرىنە قاۋىپ توندىرمەۋگە شاقىردى. تاۋدا كۇن كۇركىرەۋى، تۇمان مەن تۇندە تاۋ اراسىندا ءجۇرۋ ادامدارعا قاۋىپتى ەكەندىگىن ايتتى.

«تاۋداعى نايزاعاي - ەڭ ۇلكەن قاۋىپ، سەبەبى ادام بيىكتىكتە بولعاندا، نايزاعاي رازريادىنا تاپ بولۋى مۇمكىن. جاي تۇسكەندە جانە كۇن كۇركىرەگەندە اۋا تەربەلىپ، تاس قۇلاۋى مۇمكىن. نايزاعايدىڭ كەلە جاتقانىن اۋا يوندالۋىنان بىلۋگە بولادى. ونداي كەزدە ادامداردىڭ شاشتارى تۇرىپ، تاراعان كەزدە تىتىركەنۋى مۇمكىن. مەتالل زاتتارعا ادامنىڭ دەنەسى تيگەندە ەلەكتر رازريادى بولادى»، - دەدى «بۋراباي دامۋ» ج ش س- دا.

اتالىپ وتىلگەندەي، تۇمان كورۋ مۇمكىنشىلىگىن ناشارلاتىپ، جولدان اداستىرۋى مۇمكىن. ماماندار تۇندە تاۋدا جۇرمەۋگە كەڭەس بەرۋدە.

«كوپتەگەن ادامدار بۋراباي كۋرورتتىق ايماعىندا تاۋدىڭ بيىكتىگى ماڭىزدى ەمەس دەپ ەسەپتەيدى. وسىلايشا، تاۋدا ءجۇرۋ ەرەجەلەرى مەن تەحنيكا قاۋىپسىزدىگىن ەلەمەيدى. بۇل قايعىلى جاعدايعا اكەپ سوقتىرۋى مۇمكىن. سوندىقتان، ءوز بەتتەرىڭىزبەن تاۋعا شىقپاۋدى سۇرايمىز»، - دەپ تۇيىندەدى ۆەدومستۆودان.

 ەسكە سالايىق، 2018 -جىلدىڭ 25 - شىلدەسىندە 24 جاستاعى استانا تۇرعىنى سەلفي جاسايمىن دەپ، تاۋدان قۇلاپ كەتكەن ەدى. دارىگەرلەردىڭ ايتۋىنشا، ناۋقاستىڭ جاعدايى اۋىر.