پوليتسيا قىزمەتكەرلەرىنىڭ جالاقىسىن كوتەرۋ كەرەك پە؟

 استانا. قازاقپارات - مانەرلەپ سىرعاناۋشى دەنيس تەننىڭ قازاسىنان كەيىن، كۇللى قازاقستان ەلىمىزدەگى پوليتسيا قىزمەتكەرلەرىنىڭ جۇمىسىن سىننىڭ استىنا الدى.

الەۋمەتتىك جەلىلەردە ىشكى ىستەر ءمينيسترى قالمۇحانبەت قاسىموۆتىڭ ورنىن بوساتۋ تۋرالى ۇسىنىس پايدا بولىپ، قىزۋ تالقىعا ءتۇستى. ال پوليتسيا قىزمەتكەرلەرىنىڭ جالاقىسىن كوتەرۋ تۋرالى ۇسىنىس كوپشىلىكتىڭ قىتىعىنا ءتيدى.

Stan.kz اقپاراتتىق اگەنتتىگى وقىرماندارىنىڭ اراسىندا ساۋالناما جۇرگىزىپ، ساياساتتانۋشى مارات شيبۋتوۆپەن بايلانىسىپ، پوليتسەيلەرگە ەڭبەكاقىنى نەلىكتەن كوتەرۋ كەرەكتىگىن انىقتادى.

اقپاراتتىق اگەنتتىك Instagram الەۋمەتتىك جەلىسىندە وقىرمانداردىڭ اراسىندا «پوليتسەيلەردىڭ جالاقىسىن كوتەرۋ كەرەك پە؟» دەگەن تاقىرىپتا ساۋالناما جۇرگىزدى.

وقىرمانداردىڭ 75 پايىزى «جوق»، ال قالعان 25 پايىزى «ءيا» دەپ جاۋاپ بەردى. ولاردىڭ ءبىر بولىگى «جۇمىستارىنىڭ ناتيجەسى جوق، قىلمىس كوبەيدى. ەكى كۇننىڭ بىرىندە زورلىق- زومبىلىق»، «اقشالارى كوپ بولعان سايىن ولار جۇمىس ىستەگىلەرى كەلمەيدى»، «قىلمىسكەر ەمەس ادامنان قىلمىسكەر جاساپ قويادى» دەپ پوليتسەيلەرگە كوڭىلدەرى تولمايتىنىن جازدى. ال ەكىنشى بولىگى «كوتەرۋ كەرەك، ولار ازاننان كەشكە دەيىن تىنباي شارشاپ جۇمىس ىستەيدى عوي»، «جالاقىلارى كوتەرىلمەسە، پارا الۋىن، زاڭعا قايشى ارەكەتتەر جاساۋىن توقتاتپايدى» دەگەن پىكىرلەردى قالدىردى.

ءار ادامنىڭ پىكىرى ءار الۋان. ساياسات تانۋشى مارات شيبۋتوۆ تا پوليتسيا قىزمەتكەرلەرىنىڭ جالاقىسى جايىندا ءوز ويىمەن ءبولىستى:

«ولاردىڭ جالاقىسىن كوتەرۋ جايىندا ءسوز قوزعاماي تۇرىپ، پوليتسەيلەردىڭ جۇمىس ىستەۋ دەڭگەيىن انىقتاپ العانىمىز ءجون. ولار ءتىپتى وزدەرىنىڭ قازىرگى جالاقىلارىنا ساي ەڭبەكتەنبەيدى، تاپقان اقشالارىن اقتامايدى. 2017 -جىلدىڭ وزىندە قالادا 67 مىڭ قىلمىس ورىن الدى. 45 مىڭ ۇرلىق ءىسىنىڭ ىشىندە سوتقا تەك 4 مىڭى جەتكەن. 38 مىڭ ءىستىڭ قىلمىسكەرلەرىن پوليتسيا قىزمەتكەرلەرى ۇستاي الماعان»، - دەيدى ول.

«پوليتسەيلەر ءۇشىن قىزمەتكە جاۋاپكەرشىلىكپەن قاراۋ دەگەن تۇسىنىك جوق سياقتى. ولار قىلمىستىق توپتارمەن بىرىگىپ جۇمىس ىستەيدى. پوليتسياعا ءىرى جەمقورلىق قىلمىستاردى جۇزەگە اسىرۋ ءۇشىن بارادى دەسەك، ارتىق ايتقانىمىز ەمەس. ارينە، پوليتسەيلەردىڭ اراسىندا ءوز جۇمىسىن جاقسى كورەتىن ازاماتتار دا بار. ءبىراق ولار جەمقورلىققا قارسى توتەپ بەرۋگە قينالادى»، - دەيدى مارات شيبۋتوۆ.

مارات شيبۋتوۆتىڭ سوزىنشە، ادامدار پوليتسيا قىزمەتكەرلەرىنە سەنۋدەن قالعان. سوندىقتان قازىرگى ۋاقىتتا پوليتسيادا تەك ەڭبەگىنە ادال ازاماتتاردى قالدىرۋ كەرەك، دەپ پىكىرىن ءبىلدىردى ساياساتتانۋشى.

«پوليتسيا جۇمىسى رەتكە كەلۋ ءۇشىن، قىزمەتكەرلەردى «تازالاپ»، ءوز ىسىنە ادالدىقپەن قارايتىن ازاماتتاردى عانا جۇمىسىندا قالدىرۋ قاجەت. وسىدان كەيىن پوليتسيا قىزمەتكەرى ءوزىن جاقسى قىرىنان تانىتسا، ونىڭ جالاقىسىن كوتەرۋگە بولادى»،- دەيدى ول.