امەريكالىق پروموۋتەر گولوۆكيننىڭ «ءىزباسارىن» اتادى

 استانا. قازاقپارات - امەريكالىق پروموۋتەر توم لەففلەر 23 جاستاعى ۋكرايندىق نوكاۋتشى سەرگەي بوگاچۋكتى (10-0، 10 ك و) ورتا سالماقتاعى الەم چەمپيونى گەننادي گولوۆكين (38-0-1، 34 ك و) سياقتى بيىك شىڭداردى باعىندىرا الادى دەپ ەسەپتەيدى، دەپ حابارلايدى Sports.kz.

«بوگاچۋكتىڭ الەۋەتى زور. ابەل سانچەس - ول ءۇشىن مىقتى باپكەر. ونىڭ جاتتىعۋلاردا قالاي جۇمىس ىستەيتىنىن، گولوۆكين مەن گاسسيەۆتەن قالاي ۇيرەنىپ جاتقانىن كورىپ ءجۇرمىن. ونىڭ بولاشاعى الدا. بوگاچۋك بيگ بەار جاتتىعۋ لاگەرىندە گولوۆكينمەن، گاسسيەۆپەن جانە باسقالارمەن جاتتىعىپ جاتىر. جاستار وسىنداي بوكسشىلاردان ۇيرەنۋلەرى ءتيىس. سەرگەي ولارمەن بىرگە جۇمىس ىستەي وتىرىپ، ءوسىپ جاتىر. ادامدارعا سەرگەيدىڭ رينگتە كورسەتىپ جاتقانى ۇنايدى. ادامدار نوكاۋتتى ۇناتادى. مايك تايسون نەگە تانىمال بولدى؟ سەبەبى، ول ءبارىن نوكاۋتقا تۇسىرەتىن. بوگاچۋك نوكاۋتتىڭ ارقاسىندا گولوۆكين سياقتى تانىمال بولادى دەپ ويلايمىن. ونىڭ ۇلى چەمپيون بولۋعا الەۋەتى بار»، - دەدى لەففلەر Luckypunch.net جوباسىنا بەرگەن سۇحباتىندا.