ەلىمىزدە قاي قىلمىستار بويىنشا جازا جەڭىلدەيدى
وسىعان بايلانىستى ءتيىستى زاڭناماعا وزگەرىستەر ەنگىزىلدى. وسى ايدىڭ سوڭىندا اتالعان وزگەرىستەر كۇشىنە ەنەدى، دەپ حابارلايدى قازاقپارات ءتىلشىسى.
ق ر باس پروكۋرورىنىڭ ورىنباسارى مارات احمەتجانوۆتىڭ ايتۋىنشا، وسى سالاداعى ساياساتتى ىزگىلەندىرۋ اياسىندا قىلمىستىق كودەكسكە 262 وزگەرىس، قىلمىستىق-پروتسەسسۋالدىق كودەكسكە - 45، سونداي-اق، قىلمىستىق- اتقارۋ كودەكسىنە 9 وزگەرىس ەنگىزىلدى.
اتاپ ايتقاندا، ادام ولىمىنە قاتىسى جوق 247 قىلمىس بويىنشا العاش رەت قوعامدىق جۇمىستار بالامالى جازا رەتىندە قولدانىلاتىن بولادى. بۇدان بولەك، ايىپپۇلدىڭ ەڭ تومەنگى مولشەرى 500 ا ە ك- تەن 200 ا ە ك- كە دەيىن (1,2 ميلليون تەڭگەدەن 481 مىڭ تەڭگەگە) ازايتىلادى. ەندى، ونى ءۇش ايدا ەمەس، التى ايدا تولەۋگە بولادى.
«وسىنىڭ ارقاسىندا مىڭداعان ادام سوتقا جۇگىنىپ، ايىپپۇلدىڭ مولشەرىن ازايتىپ قانا قويماي، ونى تولەۋ مەرزىمىن ۇزارتا الادى»، - دەدى م. احمەتجانوۆ استانادا وتكەن باسپا ءسوز ءماسليحاتىندا.
ال ەكونوميكالىق قىلمىستىق بويىنشا ءىرى جانە اسا ءىرى كولەمدەگى شىعىننىڭ مولشەرى ەكى ەسەگە ارتادى. وسىعان بايلانىستى 2,5 مىڭ سوتتالعان ادامنىڭ جازاسى قىسقارادى. ولار مۇلىكتى تالان-تاراجعا سالۋ مەن الاياقتىق ءۇشىن تۇرمەگە قامالعان بولاتىن.
بۇدان بولەك، 12 اۋىر قىلمىس بويىنشا سۋديالار باس بوستاندىعىن شەكتەۋ جازاسىن قولدانا الادى. اتالعان قىلمىستارعا اسكەري، ەكونوميكالىق، لاۋازىمدىق جانە مۇلىككە قاتىستى زاڭ بۇزۋشىلىقتار كىرەدى. ەسەسىنە ايىپپۇلداردىڭ كولەمى ارتادى. ال 2 جىلعا دەيىن جانە العاش رەت سوتتالعاندار قاۋىپسىزدىك دەڭگەيى تومەن مەكەمەلەرگە اۋىستىرىلادى. «جالپى، ىزگىلەندىرۋ شارالارىمەن 5 مىڭ ادام قامتىلادى. ءبىراق ولاردى ءبىر ۋاقىتتا بوساتپايدى. سوتتار وتىنىمدەردى قاراۋى قاجەت. ءوز شەشىمىن شىعارۋى ءتيىس. ايىپپۇل سالا ما، باسقا مەكەمەگە اۋىستىرا ما، وسىنىڭ بارىنە ءبىراز ۋاقىت كەتەدى. وسى ورايدا ماڭىزدى ءبىر ماسەلەنى اتاپ وتكەن ءجون، ادام ولتىرگەن، زورلىق جاساعان، ەكسترەميزم مەن تەرروريزمگە بارعان، قاراقشىلىق پەن ۇرلىق جاساعان ادامداردى ەشكىم بوساتپايدى»، - دەپ اتاپ كورسەتتى م. احمەتجانوۆ.
