كاسىپقوي بوكس: مەيىرىم نۇرسۇلتانوۆ الداعى جەكپە-جەگىنە پىكىر ءبىلدىردى
«مەنىڭ ماقساتىم نوكاۋتقا ءتۇسىرۋ عانا ەمەس، سونداي-اق كورەرمەندەرگە، فاناتتارىم مەن كومانداعا ادەمى جەڭىس سىيلاۋ. الدىڭعى جەكپە-جەكتە مىقتى قارسىلاسقا تاپ بولدىم. ونىڭ بوكستاسۋ ستيلىمەن ءبىراز قينالدىم. ول كەزدە تەحنيكالىق نوكاۋتپەن وزدىم، الايدا وسى جولى جەڭىسكە جىلدامىراق جەتۋگە بەل بۋدىم. بوكستاعى ونەرىمدى بارىنشا كورسەتكىم كەلەدى، الايدا جاعداي ۇنەمى ءبىز ويلاعانداي بولا بەرمەيدى»، - دەدى نوكاۋتشى.
بوكسشىنىڭ ايتۋىنشا، ءار قارسىلاستىڭ وزىنە ءتان ەرەكشەلىگى بولادى. ول سوڭعى بىرەر سەكۋندتىڭ ىشىندە جوسپارىن وزگەرتىپ جىبەرۋى مۇمكىن.
«ءار جەكپە-جەك سايىن ءوزىمدى جاقسى قىرىنان تانىپ جاتىرمىن. باتيستا بىرنەشە رەت جەڭىلىسكە ۇشىراعان. الايدا كاسىپقوي بوكستا ونىڭ ەش ماڭىزى جوق. مەن ءار كەزدەسۋگە ءجۇز پايىز دايىندىقپەن كەلەمىن. فاناتتارىمنىڭ قاتارىن اتلانتيك-سيتي حالقىمەن تولىقتىرعىم كەلەدى. جانكۇيەرلەرىمنىڭ كوپ بولعانى كاسىپقوي بوكسشى رەتىندە وسۋىمە ىقپال ەتەدى. بار كۇشىمدى سالىپ، قازاقستاندىق بوكس مەكتەبىندە جاساعان ەڭبەگىمىزدى كورسەتۋگە تىرىسامىن. ماقساتىم - چەميوندىق بەلدىكتەر جيناي باستاۋ. قازىر رەيتينگتەردە جوعارى ساتىعا كوتەرىلە باستادىم. بولاشاقتا دا ءدال وسىلاي جالعاسا بەرەدى دەپ ۇمىتتەنەمىن»، - دەدى نۇرسۇلتانوۆ.
