تۇركىستان وبلىسىندا سىرتقى تاۋار اينالىمى ۇلعايدى

تۇركىستان. قازاقپارات - تۇركىستان قالاسىنداعى ق. ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىندە تۇركىستان وبلىسىنىڭ اكىمى جانسەيىت تۇيمەبايەۆتىڭ توراعالىعىمەن جيىن ءوتتى، دەپ حابارلايدى قازاقپارات تۇركىستان وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.

ماجىلىستە تۇركىستان وبلىسى بويىنشا مەملەكەتتىك كىرىستەر دەپارتامەنتىنىڭ باسشىسى الىبەك تىلەگەنوۆ العاشقى جارتىجىلدىقتى قورىتىندىلاپ بايانداما جاسادى.

ونىڭ ايتۋىنشا، «كولەڭكەلى ەكونوميكامەن» كۇرەستە ناتيجەلى جۇمىستار اتقارىلۋدا. اعىمداعى جىلدىڭ العاشقى 6 ايى بويىنشا مەملەكەتتىك بيۋجەت جوسپارى %103 ورىندالىپ، ناقتى 151 ميلليارد تەڭگە وندىرىلگەن. وبلىستىڭ سىرتقى ساۋدا اينالىمى 1 ميلليارد 249 ميلليون ا ق ش دوللارىن قۇراپ، وتكەن جىلدىڭ وسى كەزەڭىمەن سالىستىرعاندا تاۋار اينالىمى 322 ميلليون ا ق ش دوللارىنا نەمەسە 35 پايىزعا ۇلعايعان. جەرگىلىكتى اتقارۋشى جانە قۇزىرەتتى ورگاندارمەن بىرلەسە اتقارعان جۇمىستاردىڭ ناتيجەسىندە جىل باسىنان بەرى بيۋجەتكە قوسىمشا انىقتالعان ىشكى رەزەرۆتەر ەسەبىنەن جالپى 13,2 ميلليارد. تەڭگە ءوندىرىلدى. سونداي-اق، دەپارتامەنت باسشىسى ءا. تىلەگەنوۆ قوسىمشا كىرىس كوزدەرىن انىقتاۋ جۇمىستارى جۇرگىزىلسە، سالىق سالۋ بازاسىن كەڭەيتۋگە مۇمكىندىكتەر بار ەكەندىگىن ناقتى دالەلدەرمەن بايانداپ ءوتتى.

اتاپ ايتقاندا، ساۋدا ورىندارى مەن سالتانات سارايلارىنىڭ (تويحانالار) سالىقتى ۋاقتىلى ءارى زاڭعا سايكەس تولەۋىن قاداعالاعان ءجون. ماسەلەن، سالىق تولەۋدەن «الاتاۋ»، «سۇلتان» جانە باسقا دا سالتانات سارايلارىنان كەمشىلىكتەر انىقتالىپ وتىر. ءىرى دەمالىس ورىندارى دا زاڭنان اتتاپ ءوتىپ، نەبىر قۋلىقتارعا بارىپ جاتىر. اۋدان، قالالار اۋماعىندا جەرگىلىكتى بيۋجەت ەسەبىنەن جاڭارتىلعان نەمەسە جاڭادان تارتىلعان گاز، سۋ جەلىلەرىنىڭ ۋاقتىلى ءتيىستى شارۋاشىلىق سۋبەكتىلەرىنىڭ بالانستارىنا وتكىزىلمەۋى سالدارىنان دا مۇلىك جانە جەر سالىقتارىن جوعالتۋدا. وسى جانە وزگە دە جۇمىستاردى بايانداعان دەپارتامەنت باسشىسى زاڭسىزدىقتارمەن كۇرەسۋ باعىتىنداعى ءىس-شارالار جالعاساتىنىن ايتتى.

وبلىس اكىمى جانسەيىت تۇيمەبايەۆ سالىق جانە بيۋجەتكە تۇسەتىن باسقا دا تولەمدەردىڭ مەملەكەت بيۋجەتىنە تولىق جانە ۋاقىتىلى ءتۇسۋى مەملەكەتىمىزدىڭ ەكونوميكالىق دامۋىنا، قاۋىپسىزدىگىن قامتاماسىز ەتۋدە جانە حالقىمىزدىڭ الەۋمەتتىك جاعدايىن جاقسارتۋدا ماڭىزى جوعارى ەكەنىن ايتتى. سالىقتى ۋاقتىلى جيناۋ، «كولەڭكەلى ەكونوميكامەن» كۇرەس جۇرگىزۋ جونىندە ءتيىستى ۋاكىلەتتى جانە اتقارۋشى ورگاندارعا ناقتى تاپسىرمالار بەردى.

«تۇركىستان وبلىسى بيۋدجەتىنىڭ 80 پايىزى دوتاتسيا ارقىلى كەلەدى. ءبىز دوتاتسيانى ازايتۋ ماقساتىندا سالىقتى ۋاقتىلى تولەۋىمىز كەرەك. كاسىپكەرلەر تابىسىن جاسىرماي، سالىعىن زاڭعا سايكەس تولەپ، جاناشىرلىق تانىتۋلارى ءتيىس. مىسالى، وبلىستاعى 190 قوناق ۇيدەن نەبارى 68 ميلليون تەڭگە سالىق تۇسسە، 436 كاسىپكەر سالىقتى جاسىرىپ وتىر. ءوڭىر تۇرعىندارىنىڭ كولىك سالىعىنان قارىزى 1 ميلليارد تەڭگەگە جەتكەن. بۇل - ويلانارلىق جاعداي. دەپارتامەنت باسشىسى كوپتەگەن ماسەلەردى اتاپ ءوتى. ولاردىڭ ءبارىن باقىلاۋدا ۇستاپ، جۇمىستى شيراتقان ءجون»، - دەدى جانسەيىت تۇيمەبايەۆ.