مەديتسينالىق ۇيىمدارداعى قاعازباستىلىققا تىيىم سالىنادى
«جالپى، ەلىمىزدىڭ مەديتسينالىق ۇيىمدارى ەلەكتروندىق فورماتقا اۋىسىپ جاتىر، ياعني مەديتسينالىق قۇجاتناما ەلەكتروندىق نۇسقادا جۇرگىزىلەدى. وسى ورايدا قاعاز تۇرىندەگى امبۋلاتورلىق كارتالاردان باس تارتامىز. سونىمەن بىرگە، مەديتسينالىق ۇيىمدار جۇرگىزەتىن بەلگىلى ءبىر ستاتيستيكالىق قۇجاتتار دا ەلەكتروندىق فورماتتا بولادى. الداعى جىلدىڭ 1 - قاڭتارىنان مەديتسينالىق ۇيىمداردا قاعاز تۇرىندەگى قۇجات اينالىمى بولمايدى دەپ قاراستىرىپ وتىرمىز»، - دەدى دەنساۋلىق ساقتاۋ ۆيتسە- ءمينيسترى ءلاززات اقتايەۆا ۆەدومستۆونىڭ فەيسبۋكتەگى پاراقشاسىنداعى ساۋالدارعا جاۋاپ بەرۋ كەزىندە.
وسى ورايدا ول قازىرگى كەزدە ازاماتتارعا دارىگەرگە جازىلۋ، دارىگەردى ۇيگە شاقىرتۋ مەن مەديتسينالىق ۇيىمعا تىركەلۋ سەكىلدى ونلاين قىزمەتتەر قولجەتىمدى ەكەنىن ەسكە سالىپ ءوتتى.
«سيفرلاندىرۋ مەديتسينالىق ۇيىمداردىڭ جۇمىسىن جەڭىلدەتەدى. ەلىمىزدىڭ ءاربىر ازاماتى دەنساۋلىعىنىڭ ەلەكتروندىق پاسپورتىن الادى. ول قاي جەردە ەم قابىلداسا دا، بارلىق مالىمەتتەر ونىڭ جەكە كابينەتىنە ەنگىزىلەدى. بۇل ءوز كەزەگىندە باسقا دارىگەرگە بارعان كەزدە ەم- دوم شارالارىن جەڭىلدەتەدى»، - دەدى ول.
اۆتور: رۋسلان عابباسوۆ
