19:47, 26 - شىلدە 2018 | GMT +5
استرولوگ كەڭەسى: اي تۇتىلعان كۇنى ماڭىزدى شەشىمدەر قابىلداماڭىز
الماتى. قازاقپارات - شىلدەنىڭ 27-نەن 28-نە قاراعان ءتۇنى قازاقستاندىقتار ەڭ ۇزاق ايدىڭ تۇتىلۋىن تاماشالاي الادى. بۇل تۋرالى قازاقپارات تىلشىسىنە استرولوگ ارمان شتاتبايەۆ ايتىپ بەردى.
وسى كەزدە اي قىزىل تۇسكە بويالادى. استرولوگتار بۇل قۇبىلىستى «قاندى تۇتىلۋ» دەپ اتايدى. ولاردىڭ ايتۋىنشا، ايدىڭ تۇتىلۋى جەر تۇرعىندارىنىڭ ومىرىنە اسەر ەتۋى مۇمكىن.
«ايدىڭ تۇتىلعانىنا جالاڭ كوزبەن قاراۋدىڭ ەش قاۋىپتىلىگى جوق. الايدا پسيحيكالىق اۋىتقۋشىلىعى بار ادامداردىڭ بۇل قۇبىلىستى تاماشالاۋىنا بولمايدى. مۇنىڭ اسەرىنەن ولاردىڭ مازاسى كەتىپ، كۇيگەلەكتەنىپ، دەپرەسسياعا ۇشىراۋى مۇمكىن. سونداي- اق، بۇل كۇنى ماڭىزدى شەشىم قابىلداماعاندارىڭىز دۇرىس. كيكىلجىڭگە جول بەرمەڭىز»، - دەدى استرولوگ ارمان شتاتبايەۆ
بۇدان بولەك، ەرتەڭ تاعى ءبىر وزگەشە كورىنىس - مارستىڭ جەرگە جاقىنداۋىن تاماشالاۋعا بولادى. پلانەتانى شولپان جۇلدىزىنا قاراعانىڭىزداي انىق كورە الاسىز.
اۆتور: ارايلىم جولداسباي
