تايىنشا اۋدانىندا العاشقى قان تازارتۋ كابينەتى اشىلدى

پەتروپاۆل. قازاقپارات - تايىنشا اۋدانىنىڭ ورتالىق اۋداندىق اۋرۋحاناسىندا قان تازارتۋ كابينەتى اشىلدى، دەپ حابارلايدى قازاقپارات ءتىلشىسى.

 وڭىرلىك كوممۋنيكاتسيالار قىزمەتىنىڭ مالىمەتىنشە، كابينەتتى قاجەت قۇرالدارمەن جابدىقتاۋعا 50 ميلليون تەڭگەدەن استام قارجى جۇمسالعان. بۇل - وبلىس اۋدانىنداعى العاشقى قان تازارتۋ كابينەتى.

«ءبىزدىڭ اۋدان بويىنشا پروتسەدۋرادان ءوتىپ جاتقان 12 ادام تىركەلدى. بۇل ءىس كەپىلدەندىرىلگەن تەگىن مەديتسينالىق كومەك اياسىندا جۇرگىزىلىپ جاتىر. سوزىلمالى بۇيرەك جەتىسپەۋشىلىگى دەرتىنە شالدىققان ناۋقاستار اپتاسىنا 3 رەت قاندارىن تازارتۋى كەرەك. ءبىر اپپاراتپەن بىردەن ءۇش ادامدى قابىلداي بەرەمىز. اۋىسىمدا 6 ادامنىڭ قانىن تازارتامىز. پروتسەدۋرا 4 ساعات ۋاقىتتى الادى»، - دەدى تايىنشا ورتالىق اۋداندىق اۋرۋحاناسىنىڭ باس دارىگەرى اناتولي رافالسكي.

دەنساۋلىق ساقتاۋ باسقارماسىنىڭ باسشىسى تيمۋر سۇلتانعازيەۆتىڭ ايتۋىنشا، وڭىردە قانىن تازارتۋدى قاجەت ەتەتىن ناۋقاستاردىڭ سانى ازداپ كوبەيگەن.

 «وتكەن جىلى 125 بولعان، بيىل 137 ادامعا جەتىپ وتىر. بۇل ناۋقاستاردى دياگنوستيكالاۋمەن بايلانىستى دەپ وتىرمىز. سەبەبى بۇيرەك جەتىسپەۋشىلىگى جاسىرىن تۇردە وتەتىن اۋرۋ، سوندىقتان تەكسەرىستەن ءوتىپ، انىقتاۋ كەرەك»، - دەدى ت. سۇلتانعازيەۆ.

پەتروپاۆلداعى العاشقى «نەفروس - س ك» قان تازارتۋ ورتالىعى 2014 -جىلى №3 قالالىق اۋرۋحانانىڭ نەگىزىندە اشىلعان ەدى. وندا 12 اپپارات بار. ءدال قازىر 62 ناۋقاس ەم قابىلداپ جاتىر.

«ءبىزدىڭ ورتالىق قالا جانە اۋىل تۇرعىندارىن بىردەي قابىلداي بەرەدى. الايدا ەمگە بارىپ كەلۋ ىڭعايسىز ءارى قىمبات. سول سەبەپتى ناۋقاستار وبلىس اكىمىنە بارعان. ناتيجەسىندە حالىققا وبلىس اۋداندارىندا دياليزدىك ورتالىقتاردى اشۋ تۋرالى ۇسىنىس جاسالدى»، - دەدى «نەفروس - س ك» ج ش س ديرەكتورى ليليا گمىزينا.

 قان تازارتۋ ءۇشىن تايىنشا اۋدانىنا اقجار، ءۋاليحان جانە ايىرتاۋ اۋداندارىنىڭ تۇرعىندارى كەلەتىن بولادى. سونداي- اق، وسىعان ۇقساس كابينەتتى شال اقىن اۋدانىندا اشۋ جوسپارلانىپ وتىر.