بەنزين ەكسپورتى: قازاقستان كەدەندىك باج سالىعىن وزگەرتۋگە كىرىستى

استانا. قازاقپارات - ەنەرگەتيكا مينيسترلىگى بەنزين مەن ديزەلدى وتىننىڭ ەكسپورتى بويىنشا كەدەندىك باج سالىعىن رەفورمالاۋدى باستادى، دەپ حابارلايدى قازاقپارات ءتىلشىسى.

«Kazenerdgy» قاۋىمداستىعىنىڭ باس ديرەكتورى اسەت ماعاۋوۆتىڭ ايتۋىنشا، 2019-جىلدىڭ 1- قاڭتارىنا دەيىن قازاقستان مۇناي ونىمدەرىن ەكسپورتقا شىعارا المايدى. اتالعان مىندەت ارنايى كەلىسىمدە كورسەتىلگەن. ءبىراق بيىل ءۇش مۇناي وڭدەۋ زاۋىتى تولىعىمەن ىسكە قوسىلعاننان كەيىن دايىن مۇناي ونىمدەرىنىڭ كولەمى ارتادى. ونى ءبىر جاققا ەكسپورتتاۋ قاجەت.

«قازىرگى كەزدە ەنەرگەتيكا مينيسترلىگى بەنزين مەن ديزەلدى وتىننىڭ ەكسپورتى بويىنشا كەدەندىك باج سالىعىن وزگەرتۋگە كىرىستى. ءبىز دە اتالعان جۇمىسقا اتسالىسىپ جاتىرمىز. ەندى، كەلەسى جىلدىڭ 1-قاڭتارىنا دەيىن بەنزين مەن ديزەلدى وتىندى ەكسپورتقا شىعارا المايمىز. دەگەنمەن، وزىمىزدە مۇناي وڭدەۋ كولەمى ايتارلىقتاي ارتادى. سوندىقتان جاقىن جانە الىس شەت ەلدەرگە مۇناي وندىمدەرىن تاسىمالداۋ جولدارى اشىلسا ەكەن دەيمىز»، - دەدى ءا. ماعاۋوۆ استانادا وتكەن باسپا ءسوز ءماسليحاتىندا.

ونىڭ سوزىنە قاراعاندا، بۇگىندە مۇناي ونىمدەرىنىڭ اكتسيزدەرى سالاسىندا ءبىرقاتار ماسەلەلەر بار. وتاندىق ءونىم وندىرۋشىلەر تىم كوپ تولەيدى. ال كورشى رەسەيلىكتەر ەكى ەسەگە تومەن اكسيزدى تولەپ، ءوز ونىمدەرىن تاسىمالداي بەرەدى.

«اكسيزدىڭ مولشەرى بىردەي بولۋى كەرەك. ماسەلەن، رەسەيلىكتەر ءوز بەنزينىن يمپورتتاعاندا 4500 تەڭگە تولەسە، وتاندىق زاۋىتتار 10500 تەڭگە تولەيدى. سول سياقتى ديزەلدى وتىن بويىنشا كورشىلەر 540 تەڭگە اۋدارادى. ال وتاندىق ءونىم ءۇشىن 9300 تەڭگە تولەۋگە تۋرا كەلىپ وتىر»، - دەپ اتاپ كورسەتتى ءا. ماعاۋوۆ.

ايتا كەتەيىك، بۇگىن ق ر سىرتقى ىستەر مينيسترلىگى مەن «Kazenerdgy» قاۋىمداستىعى ارنايى باسپا ءسوز ءماسليحاتىن وتكىزىپ، شەتەلدىڭ ديپلوماتتارىنا مۇناي-گاز سالاسىنداعى جوسپارلار تۋرالى ايتىپ بەردى.