مىرزاعالي ايتجانوۆ: ازياداعا سوڭعى دايىندىقتى استانادا وتكىزەمىز
- مىرزاعالي قۇلان ۇلى، XVIII ازيادا ويىندارىنا دا ءبىر ايدان از ۋاقىت قالدى. بيىلعى جىلدىڭ باستى دوداسىنا دايىندىقتارىڭىز قالاي؟
- دايىندىعىمىز وتە جاقسى. شىلدەنىڭ باسىندا الماتىدا، الاتاۋ بوكتەرىندە كەزەكتى وقۋ-جاتتىعۋ جيىنىمىزدى باستاعان بولاتىنبىز. بۇگىن جىگىتتەردى قىسقا مەرزىمگە، ياعني ءبىر اپتالىق دەمالىسقا ۇيلەرىنە جىبەرىپ جاتىرمىن. ونداعى ماقسات - ۇزاق جاتتىعۋدان كەيىن كىم بولسا دا، وتباسىن ساعىنادى. اۋىلدىڭ ايران-ءسۇتىن ءىشىپ، قازى-قارتاسىن جەگىسى كەلەدى. سول ءۇشىن وسىنداي شەشىم قابىلدادىق.
- الماتىدا وتكەن وقۋ-جاتتىعۋ بارىسى تۋرالى قىسقاشا ايتىپ وتسەڭىز...
- نەگىزى الماتىدا جالپى دەنە دايىندىعىن وتكىزدىك. تازا اۋادا جاقسىلاپ كۇش-قۋات الدى دەگەن ويدامىن. جىگىتتەر 3200 مەترگە دەيىن تاۋ شىڭىنا شىعىپ جاتتىقتى. ودان بولەك الاتاۋ ەتەگىندە قىر-سايلارمەن كۇندەلىكتى جۇگىرىپ تۇردى. سونىمەن قاتار تاۋدىڭ تاسىمەن جاتتىعۋ جاسادىق. بوكستاسۋدى دا ۇمىت قالدىرعان جوقپىز. سپاررينگ جاتتىعۋلاردى دا ءجيى جاسادىق. بىزبەن بىرگە بوكستان جاستار قۇراماسى دا وقۋ-جاتتىعۋ جيىنىن وتكىزدى. ولار الەم بىرىنشىلىگىنە دايىندالدى. وسى ورايدا ءبىزدىڭ قۇرامانىڭ جىگىتتەرى ولارعا اعالىق ءىلتيپاتىن كورسەتىپ، بىرگە جاتتىعۋ وتكىزدى. ءبىز ەرتەڭگى ۇمىتتەرىمىز - جاس بوكسشىلارىمىزعا قولداۋ كورسەتتىك.
- ەندى، ازياداعا سوڭعى وقۋ-جاتتىعۋلارىڭىز قاشان، قايدا وتەدى؟
- سوڭعى وقۋ-جاتتىعۋىمىز ارنايى تەحنيكا-تاكتيكالىق جاعىنان دايىندىق بولماق. ءبىز ونى استانادا وتكىزەمىز. قىسقا دەمالىسقا كەتكەن جىگىتتەرىمىز 4- تامىز كۇنى ەلورداداعى جاتتىعۋ بازاسىندا باس قوسادى. ءبىز وندا 16- تامىزعا دەيىن دايىندالىپ، سول كۇنى كەشتە دجاكارتاعا ۇشىپ كەتەمىز. جارىستىڭ اشىلۋ سالتاناتىنا قاتىسامىز. وزدەرىڭىز بىلەتىندەي، ءبىزدىڭ قۇرامانىڭ مۇشەسى ءابىلحان امانقۇل ازيادانىڭ اشىلۋ سالتاناتىندا قازاقستان تۋىن الىپ شىعادى.
- ازيادادان قانشا مەدال الۋدى كوزدەپ وتىرسىزدار؟
- بيىل ازيادادا بوكستان ەرلەر اراسىندا تەك جەتى-اق مەدال جيىنتىعى ساراپقا سالىنادى. حالىقارالىق اۋەسقوي بوكس قاۋىمداستىعى ازيادا باعدارلاماسىنان 81، 91 جانە 91+ كەلى سالماق دارەجەلەرىن الىپ تاستاعان. بۇل ءۇش سالماقتاعى جىگىتتەرىمىز ۇشەۋى دە باس جۇلدەدەن ۇمىتكەر جىگىتتەر بولاتىن. ءبىراق، ءبىز اپاراتىن جەتى بوكسشى دا - ءوز سالماقتارىنىڭ ساڭلاقتارى. سوندىقتان كەمى ەكى التىن دەپ وتىرمىز.
- ازياداعا باراتىن جىگىتتەر تۋرالى قىسقاشا ايتا كەتسەڭىز...
- ءار بوكسشىنىڭ جەتىستىكتەرى، ەرەكشەلىكتەرى تۋرالى جەكە-جەكە ايتپاي-اق قويايىن. سەبەبى ولار - وسىعان دەيىن تالاي سىنداردا ەل نامىسىن قورعاپ جۇرگەن بەلگىلى بوكسشىلار. اتتارىن عانا اتاپ، وقىرمان ەسىنە سالايىن. 49 كەلىدە تەمىرتاس ءجۇسىپوۆ، 52 كەلىدە ازات ماحمەتوۆ، 56 كەلىدە قايرات ەراليەۆ، 60 كەلىدە ءساماتالى تولتايەۆ، 64 كەلى سالماقتا بەكداۋلەت يبراگيموۆ، 69 كەلىدە اسلانبەك شىمبەرگەنوۆ جانە بيىلعى ازيادانىڭ ەڭ اۋىر سالماقتاعى بوكسشىسى، ياعني 75 كەلى سالماقتا ءابىلحان امانقۇل ەل نامىسىن قورعايدى.
- اڭگىمەڭىزگە راحمەت!
اۆتور: كۇنسۇلتان وتارباي
