ەلوردالىق ءتورت پاراشيۋتشى حالىقارالىق فەستيۆالعا قاتىسادى

استانا. قازاقپارات - استاناداعى «دوس» تاۋەلسىز ءومىر» ورتالىعىنىڭ ءتورت مۇشەسى پاراشيۋتپەن سەكىرۋدەن وتەتىن حالىقارالىق فەستيۆالعا قاتىسادى، دەپ حابارلايدى قازاقپارات قازاقستاننىڭ رەسەيدەگى ەلشىلىگىنىڭ سايتىنا سىلتەمە جاساپ.

جارىس شىلدەنىڭ 25-29 ى ارالىعىندا رەسەيدىڭ ريازان وبلىسىندا وتەدى. شاراعا الەمنىڭ ءار تۇكپىرىنەن تىرەك-قيمىل جۇيەسىنە زاقىم كەلگەن مۇمكىندىگى شەكتەۋلى جاندار جينالادى.

قاتىسۋشىلار جاتتىعۋلاردى نۇسقاۋشىلارمەن بىرگە ورىندايدى. الداعى ۋاقىتتا مۇگەدەكتەر اراسىندا بۇل سپورت ءتۇرىن دامىتۋ جوسپارلانىپ وتىر. وسىعان وراي «دوس» تاۋەلسىز ءومىر» مۇگەدەكتەر قوعامدىق بىرلەستىگى مەن پاراشيۋت سپورتى فەدەراتسياسى مەموراندۋمعا قول قويدى. قۇراما كوماندا مۇشەسى جانات باباعۇلوۆانىڭ ايتۋىنشا، الدىڭا ناقتى ماقسات قويا بىلسەڭ، وعان جەتۋگە مۇگەدەك ارباسى كەدەرگى بولا المايدى.

«پاراشيۋتپەن سەكىرۋدى بالا كەزدەن ارمانداعانمىن. تانىستارىمنىڭ كەڭەسىمەن پاراشيۋت كلۋبىنا باردىم. ءبىراز دايىندىقتان سوڭ كوكتە قالىقتاۋعا مۇمكىندىك الدىم. ول كەزدەگى سەزىمدى سوزبەن ايتىپ جەتكىزۋ مۇمكىن ەمەس. ەندى، مىنە، جارىسقا كەتىپ بارامىن. تالاپ بويىنشا سەكىرگەننەن باستاپ بەينەتۇسىرىلىم جاسالادى. قازىلار تەحنيكاڭا قاراپ باعالايدى. شەتەلدە بۇل سپورت ءتۇرى جاقسى دامىعان. ەندى، مىنە، بىزدە دە ونى وركەندەتۋگە قاتىستى كەلىسىمدەر جاسالىپ جاتىر»، - دەدى جانات باباعۇلوۆا.