قازاقستاندىقتاردىڭ شەتەلدەگى اقشاسى مەن مۇلكىن تەكسەرەمىز - قارجى مينيسترلىگى

استانا. قازاقپارات - ق ر قارجى مينيسترلىگى مەملەكەتتىك كىرىستەر كوميتەتى قازاقستاندىقتاردىڭ شەتەلدەگى ەسەپشوتتارى مەن اكتيۆتەرى تۋرالى اقپاراتتى الدىرتاتىنىن ەسكەرتتى. اتالعان جۇمىس ستراسبۋرگ كونۆەنسياسى اياسىندا اتقارىلادى، دەپ حابارلايدى قازاقپارات ءتىلشىسى.

سالىق سالۋ ادىستەمەسى بويىنشا دەپارتامەنت ديرەكتورى قايرات جولمۇحامبەتوۆتىڭ ايتۋىنشا، قازىرگى ەكىجاقتى كەلىسىمدەر بويىنشا باسقا ەلدەرگە سۇراۋ سالۋ قاجەت. سوندا عانا ناقتى ءبىر سالىق تولەۋشىگە قاتىستى اقپارات جىبەرىلەدى. سالىق ءتۇرىن دە كورسەتۋ كەرەك. «ال ستراسبۋرگ كونۆەنسياسى اياسىندا بارلىق سالىقتار بويىنشا اقپارات الماسۋعا بولادى. سوسىن جازباشا اقپاراتتان بولەك اۆتوماتتى تۇردە مالىمەت الماسۋ تەتىگى دە بار. بۇل دەگەنىمىز، حات جازىپ، سۇراۋ سالۋدىڭ قاجەتى جوق. بۇدان بولەك، سالىقتى ءوندىرۋ بويىنشا ءوزارا كومەك شارالارى دا بار. بىرلەسكەن تەكسەرىستەردى دە وتكىزەتىن بولامىز، - دەدى ق. جولمۇحامبەتوۆ استانادا وتكەن باسپا ءسوز ءماسليحاتىندا.

وسىدان بەس جىل بۇرىن قازاقستان ستراسبۋرگ كونفەنتسياسىنا قول قويعان بولاتىن. ءبىر جىلدان كەيىن اتالعان قۇجات راتيفيكاتسيالاندى. سونىڭ اياسىندا سالىق سالاسىنداعى اقپاراتپەن اۆتوماتتى تۇردە ءوزارا الماسۋعا مۇمكىندىك بار. وسى ۋاقىتقا دەيىن كونۆەنتسياعا 124 مەملەكەت قوسىلدى. سونىڭ ىشىندە G20 جانە ەكونوميكالىق ىنتىماقتاستىق جانە دامۋ ۇيىمىنىڭ ەلدەرى بار. اتالعان ەكى ۇيىم قارجى سالاسىنداعى اقپاراتپەن الماسۋدىڭ كوپجاقتى كەلىسىمىن ازىرلەپ بەكىتتى. اعىمداعى جىلى 26 - ماۋسىمدا قازاقستان اتالعان قۇجاتقا دا قوسىلدى.

«ەندى، ءبىز 102 مەملەكەتپەن جۇمىس جاساپ، قارجى ەسەپ- شوتتارى تۋرالى اقپاراتپەن الماساتىن بولامىز. قازىرگى كەزدە قازاقستان ە ى د ۇ- نىڭ ارنايى جۇمىس توبىنا كىرىپ، اتالعان ستاندارتتى ەنگىزۋگە قاتىستى دايىندىق شارالارىن باستاپ كەتتى. وسىعان وراي، ۇلتتىق زاڭناماعا ءتيىستى وزگەرىستەر ەنگىزىلەتىن بولادى. جوسپار بويىنشا 2019 - جىلعى بارلىق اقپارات بەرىلەدى. سوندا 2020 -جىلى قىركۇيەك ايىندا بىزگە جەرلەستەرىمىزدىڭ 102 ەلدەگى بارلىق ەسەپ- شوتتارى تۋرالى اقپارات تۇسەدى. ول ەلدەردىڭ ىشىندە ۇلى بريتانيا، بەرمۋد پەن كايمان ارالدارى، شۆەيتساريا، ليۋكسەمبۋرگ، ليحتەنشتەين جانە تاعى باسقالار بار. 40-تان استام وفشورلىق يۋريسديكتسيالار دا وسى باستاماعا قوسىلىپ وتىر»، - دەپ اتاپ كورسەتتى ق. جولمۇحامبەتوۆ.

 ونىڭ ايتۋىنشا، جەكە اقپاراتتىڭ ىشىندە قارجى يەسىنىڭ اتى- ءجونى، سالىقتىق ءنومىرى، دەپوزيت پەن اكتيۆتەردەن تۇسكەن تابىستىڭ كولەمى بولادى. الايدا ول اقپارات قۇپيا مالىمەتكە جاتادى.

«اقشانىڭ سوماسىنا قارامايمىز. ءاربىر قازاقستاندىقتىڭ ەسەپشوتى تۋرالى اقپاراتتى الدىرتاتىن بولامىز. ارينە، سالىقتان جالتارعانى ءۇشىن جاۋاپكەرشىلىك قاراستىرىلعان. ماسەلەن، تابىستان تۇسكەن سالىقتى تولەمەگەنى ءۇشىن اكىمشىلىك جازا دا، قىلمىستىق جازا دا بار. نەگىزى، بۇگىنگى زاڭناما بويىنشا قازاقستان ازاماتتارى شەتەلدەگى اقشا مەن مۇلكى تۋرالى اقپاراتتى وزدەرى ۇسىنادى. ال كونۆەنسيا اياسىندا اقپارات الماسۋ ارقىلى ءبىز ول مالىمەتتەردىڭ ءبارىن سالىستىرىپ، تەكسەرە الامىز»، - دەدى ق. جولمۇحامبەتوۆ.

اۆتور: ارمان اسقاروۆ