شەنەۋنىكتەر قىزمەتتىك كولىكتەرگە قانشا قارجى جۇمسايدى؟

استانا. قازاقپارات - قازاقستاندىق شەنەۋنىكتەر وتاندىق كولىكتەردى كوپتەپ الا باستادى. وسى وزگەرىستەرگە قازاقستاننىڭ اۆتوموبيل سالاسى كاسىپورىندارىنىڭ وداعى دا ىقپال ەتتى، دەپ حابارلايدى قازاقپارات ءتىلشىسى.

ۇيىمنىڭ ديرەكتورلار كەڭەسىنىڭ ءتوراعاسى ولەگ الفەروۆتىڭ ايتۋىنشا، بىلتىر العاشقى التى ايدا مەملەكەتتىك ساتىپ الۋلار ارقىلى شەتەلدىك كولىكتەردىڭ ساۋدا-ساتتىعى 12 پروتسەنتتى قۇراعان. بيىل اتالعان كورسەتكىش 5 پروتسەنتكە تومەندەدى.

«بىلايشا ايتقاندا، بۇگىندە مەملەكەتتىك ورگاندار ساتىپ الاتىن ءاربىر 20-كولىك شەتەلدەن جەتكىزىلەدى. وتكەن جىلى ءبىرىنشى جارتىجىلدىقتا 375 شەتەلدىك كولىك ساتىپ الىنعان بولاتىن. سونىڭ بارىنە 4 ميلليارد تەڭگە جۇمسالدى. بيىل التى ايدا مەملەكەتتىك ورگاندارعا تەك 92 كولىك قانا شەتەلدەن جەتكىزىلدى. وعان 677 ميلليون تەڭگە كەتتى. ءبىز اتالعان ماسەلەنى بىلتىردان بەرى تالقىلاپ كەلەمىز. وسى شارالاردىڭ ىقپالى دا بار. ءبىز پارلامەنت ماجىلىسىمەن دە، ۇكىمەتپەن دە، قۇزىرەتتى مەملەكەتتىك ورگانمەن دە كەلىسسوزدەر جۇرگىزىپ كەلەمىز. بۇل كەلىسسوزدەردىڭ ناتيجەسى جوق ەمەس. ءبىزدىڭ ۇسىنىستارىمىز ەسكەرىلەدى دەپ سەنەمىز. سونىڭ ارقاسىندا مەملەكەتتىك ساتىپ الۋلاردى بارىنشا جەتىلدىرۋگە بولادى»، - دەدى و. الفەروۆ استانادا وتكەن باسپا ءسوز ءماسليحاتىندا.

ونىڭ سوزىنە قاراعاندا، ۇيىمنىڭ نەگىزگى ماقساتى - مەملەكەتتىك ورگانداردا شەتەلدىك كولىكتەردى ساتىپ الۋدى بارىنشا ازايتۋ. ءتىپتى، مۇلدەم تىيىم سالۋ قاجەت. ول ءۇشىن بۇرىنعى شەكتەۋدى قايتا ەنگىزۋ كەرەك.