وزبەكستاندا تەك تۋريزمدى وقىتاتىن ۋنيۆەرسيتەت قۇرىلدى

استانا. قازاقپارات - وزبەكستان پرەزيدەنتىنىڭ 2018-جىلدىڭ 28- ماۋسىمىنداعى قاۋلىسىمەن قۇرىلعان «جىبەك جول» حالىقارالىق تۋريزم ۋنيۆەرسيتەتى 2018/2019 وقۋ جىلىنان باستاپ ستۋدەنتتەردى وقىتا باستايدى. بۇل تۋرالى «ءوزا» اگەنتتىگى حابارلادى.

وسى قاۋلىعا سايكەس، تۋريزم، تۋريزم ديزاينى، تۋريزم سالاسىنداعى ماركەتينگ، تۋريستىك قىزمەتتەر تەحنولوگياسى جانە ونى ۇيىمداستىرۋ، تۋريزمدەگى لوگيستيكا، كاسىپتىك ءبىلىم بەرۋ، قوناق ءۇي بيزنەسى، مەيرامحانا بيزنەسى، مەنەدجمەنت باعىتتارى بويىنشا ۋنيۆەرسيتەتكە 125 تۇلەك قابىلدانادى.

بۇدان باسقا، وزبەكستان رەسپۋبليكاسىنىڭ تۋريزمدى دامىتۋ جونىندەگى مەملەكەتتىك كوميتەتىنىڭ سامارقاند وبلىستىق اۋماقتىق باسقارماسىنىڭ وكىلدەرى وسى پروتسەسكە كومەك كورسەتەدى. 23- شىلدەگە دەيىن 1177 ابيتۋريەنت قۇجاتتار تاپسىرعان. قۇجاتتاردى قابىلداۋ 25- شىلدەدە اياقتالادى.

ۋنيۆەرسيتەتتىڭ قىزمەتىن ۇيىمداستىرۋ بويىنشا جۇمىستى ۇيلەستىرۋدى ەسكەرە وتىرىپ، 2018/2019 وقۋ جىلىنىڭ وقۋ پروتسەسسى 2018-جىلدىڭ 1- قازانىندا باستالادى.