قازاقستاندىق وركەستر يتاليا تورىندەگى كونسەرتىن دەنيس تەننىڭ رۋحىنا ارنادى

يتاليا. قازاقپارات - «اكادەميا سوليستوۆ» مەملەكەتتىك كامەرالىق وركەسترى يتاليانىڭ بەرگولو قالاسىندا وتكەن كونسەرتىن قازا بولعان وليمپيادا جۇلدەگەرى دەنيس تەنگە ارنادى، دەپ حابارلايدى قازاقپارات ق ر مادەنيەت جانە سپورت مينيسترلىگىنە سىلتەمە جاساپ.

«قازاق كونسەرت» مەملەكەتتىك ۇيىمىنىڭ «اكادەميا سوليستوۆ» كامەرالىق وركەسترىنىڭ كونسەرتى ق ر مادەنيەت جانە سپورت مينيسترلىگىنىڭ قولداۋىمەن «Velia» مۋزىكالىق فەستيۆالى اياسىندا ءوتتى.

كەش 1 مينۋت ۇنسىزدىكپەن باستالىپ، قازاقستاننىڭ حالىق ءارتىسى، «سوليستەر اكادەمياسىنىڭ» كوركەمدىك جەتەكشىسى ايمان مۇساقوجايەۆا دەنيس تەننىڭ قازاسىنا بايلانىستى قازاقستاندىقتار مەن ونىڭ تۋعان-تۋىستارىنا كوڭىل ايتتى.

«جۇلدىزداي جارق ەتكەن دەنيس تەننىڭ مەزگىلسىز دۇنيەدەن ءوتۋى بارلىعىمىزعا اۋىر ءتيدى. بۇل جاعداي بارشا قازاق ەلى ءۇشىن اۋىر قايعى. سوندىقتان ءبىز فەستيۆال اياسىنداعى العاشقى كونتسەرتتى دەنيس تەننىڭ قۇرمەتىنە ارنادىق. جاس ءارى تالانتتى، قازاقستان مەن الەمنىڭ سۇيىسپەنشىلىگىنە بولەنىپ ۇلگەرگەن دەنيس ەلىمىزدەگى سپورتتىڭ دامۋىنا زور ۇلەس قوستى. ونىڭ ەسىمى، جەتىستىكتەرى مەن ەرەن ەڭبەگى جۇرەگىمىزدە ماڭگى ساقتالماق. ونىڭ جالىنى سونداي الاۋلاپ جاندى دا، سونداي ەرتە ءسوندى. جارقىن تۇلعا دەنيس تەن - ەلىمىزدىڭ جارىق جۇلدىزى. كونسەرتكە كەلگەن يتاليالىق ونەر سۇيەر قاۋىمعا ءبىز دەنيس تۋرالى اڭگىمەلەپ، كونسەرتتى سونىڭ قۇرمەتىنە ارنادىق»، - دەيدى ا. مۇساقوجايەۆا.

ايمان مۇساقوجايەۆا سپورتشىنىڭ رۋحىنا ارناپ برامستىڭ، سەن- سانسەنىڭ، ۆاكسماننىڭ، ساراساتەنىڭ بەلگىلى كومپوزيتسيالارىن ورىندادى.

سونىمەن قاتار، كونسەرتتىڭ شىمىلدىعىن ۇكىلى ىبىرايدىڭ «قىزىل اسىق» انىمەن اشقان ءداستۇرلى ءانشى اسقار مۇقيات پەن وتاندىق وپەرا ءانشىسى ازات مالىك ابايدىڭ «كوزىمنىڭ قاراسى» ءانىن ورىنداپ، ەۋروپالىقتاردىڭ جوعارى باعاسىن الدى.

ەكى ساعاتقا سوزىلعان كونسەرت تالعامپاز كورەرمەننىڭ قوشەمەتىنە بولەندى.