چەمپيوندار ليگاسىنىڭ ماتچىنا فۋتبولشىلار دەنيس تەننىڭ پورترەتى بەينەلەنگەن فۋتبولكامەن شىقتى

ەلوردالىق كوماندانىڭ ويىنشىلارى الاڭعا ونىڭ پورترەتى بەينەلەنگەن فۋتبولكالاردى كيىپ شىقتى. سونداي- اق، ماتچتىڭ الدىندا «استانا ارەنادا» ءبىر مينۋت ۇنسىزدىكپەن ەسكە الدى.

ايتا كەتسەك، قازاقستاندىق مانەرلەپ سىرعاناۋشى دەنيس تەن 19 -شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى مەن بايسەيىتوۆا كوشەلەرىنىڭ قيىلىسىندا، 19 -شىلدەدە تۇسكى ساعات 15:00 شاماسىندا بولعان.

سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان.

ول وڭ جاق سانىنىڭ جوعارى تۇسىنان جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى.

ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىنجانە رەسۋرستار جەتكىلىكتى ەكەندىگىن ءمالىم ەتكەن بولاتىن.

2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.

ادام ءولتىرۋ بابىمەن قىلمىستىق ءىس قوزعالدى.

بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى.

ەكىنشى كۇدىكتى - 1994 -جىلى تۋعان  قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.

سونداي-اق، دەنيس تەننىڭ ولىمىنە كۇدىكتى نۇرالى قياسوۆ كۇزەتپەن المالى اۋداندىق سوتىنا جەتكىزىلگەن.

ال دەنيس تەننىڭ ءولىمى بويىنشا كۇدىكتى ەكىنشى ادام ارمان قۇدايبەرگەنوۆ ۇستالدى.