بەلارۋس اقپاراتتىق تەحنولوگيالاردى قالاي دامىتىپ وتىر
بۇگىندە ونىڭ جوباسى تاۋار وندىرۋشىلەر مەن ساتىپ الۋشىلار ءۇشىن تىكەلەي بايلانىستى ورناتۋعا مۇمكىندىك بەرىپ وتىر. كومپانيا قازاقستان نارىعىندا جۇمىس ىستەسە دە، كەڭسەسى بەلارۋستىڭ مينسك قالاسىندا ورنالاسقان، دەپ حابارلايدى قازاقپارات ءتىلشىسى.
«بەلارۋستا اقپاراتتىق تەحنولوگيالاردى دامىتۋ ءۇشىن قولايلى ءارى ءتيىمدى جاعدايلار جاسالادى. الايدا ول جەردە ازىرلەنەتىن جوبالاردىڭ 95 پروتسەنتى ەۋروپا مەن ا ق ش- قا كەتەدى. ارينە، ەلدىڭ سيفرلانۋىنا دا كوڭىل بولىنەدى. ول جاقتا اقپاراتتىق تەحنولوگيالاردى جاساپ، اقشا تارتۋعا تىرىسادى. ءبىز بولساق، اقشا كوپ بولعاننان كەيىن، كەرىسىنشە، تەحنولوگيالاردى شەتەلدەن تارتىپ جاتامىز»، - دەيدى ب. وسپانوۆ.
ونىڭ ايتۋىنشا، كومپانيا مينسك قالاسىنداعى جوعارى تەحنولوگيالار پاركىنىڭ رەزيدەنتى بولعاننان كەيىن مەملەكەت تاراپىنان جەڭىلدىكتەر الا باستادى. «ءبىزدى سان الۋان كورمەلەرگە شاقىرادى. قولدايدى، حالىققا تانىستىرادى. ال قارجىلاي جەڭىلدىكتەرگە كەلەر بولساق، جوعارى تەحنولوگيالار پاركىنىڭ رەزيدەنتى بولعانعا دەيىن ءبىز جالاقىعا كەتەتىن اقشانىڭ 50 پروتسەنتىن سالىق رەتىندە تولەدىك. ماسەلەن، 3000 دوللار جالاقىعا بەرسەك، 1500 دوللاردى سالىققا سالدىق. قازىر ول سالىقتىڭ كولەمى نەبارى 9 پروتسەنتتى قۇراپ وتىر. سوسىن كومپانيالار تابىستىڭ 1 پروتسەنتىن پارككە تولەيدى. ماسەلەن، قانداي دا ءبىر جوبانى 1 ميلليارد دوللارعا ساتىپ، ول اقشا ەلگە كەلسە، 10 ميلليون دوللار پاركتىڭ بيۋدجەتىنە تۇسەدى. ول اقشا پاركتى دامىتۋعا سالىنادى، مامانداردىڭ بىلىكتىلىگىن ارتتىرۋعا جۇمسالادى»، - دەپ اتاپ كورسەتتى ب. وسپانوۆ.
ونىڭ سوزىنە قاراعاندا، قازاقستاندا بىلىكتى ماماندار بار. ءبىراق ولاردى ۇستاپ تۇراتىن ورتا جوق. سول سەبەپتى كوبىسى شەتەلگە كەتىپ جاتادى. ال ءىرى حالىقارالىق كومپانيالار ءوز جەرىمىزدە جۇمىس ىستەپ، جاقسى جالاقى تولەسە، كاسىبي مامانداردى ۇستاپ قالۋعا بولاتىن ەدى. ءبىر سوزبەن ايتقاندا، ورتا قاجەت. ورتانىڭ جاساي الماساق، قانشا ماماندى وقىتساق تا، سونشا مامان ەۋروپا مەن ا ق ش- قا كەتە بەرەدى.
«ماسەلەن، بەلارۋس «جوعارى تەحنولوگيالار پاركى 2.0» اتتى دەكرەتتى شىعارعاننان كەيىن ول جەردە اي سايىن 50 كومپانيا اشىلادى. بارلىعى جوعارى تەحنولوگيالار پاركىنىڭ رەزيدەنتى بولۋعا تىرىسادى. سەبەبى ول جەردە IT ماماندار كوپ. جاڭادان كەلەتىن كومپانيالار قازاقستان، وزبەكستان، تاجىكستان، قىرعىزستان مەن رەسەيدە جۇرگەن مىقتى مامانداردى جيناپ الادى دا، ءوز جوبالارىن جاسايدى. ماماندار بارادى. سەبەبى ولارعا الدەقايدا كوپ جالاقى تولەيدى»، - دەيدى ب. وسپانوۆ.
ماماننىڭ ويىنشا، بۇگىندە اقپاراتتىق تەحنولوگيالار بويىنشا ءبىلىم بەرۋگە نەگىزگى باسىمدىق بەرۋ كەرەك. سوسىن شەشىم قابىلداۋدى بارىنشا جەڭىلدەتكەن ءجون. ويتكەنى ءبىر ۇسىنىس بارلىق مينيسترلىكتەردىڭ قاراۋىنان وتكەنشە ءبىراز ۋاقىت كەتەدى. ال ول ۋاقىتتىڭ ىشىندە كوپ نارسە وزگەرەدى.
اۆتور: ارمان اسقاروۆ
