فۋتبولشى رونالدۋدىڭ دەنساۋلىعى دارىگەرلەردى تاڭعالدىردى

 استانا. قازاقپارات - پورتۋگاليالىق شابۋىلشى كريشتيانۋ رونالدۋ يتاليانىڭ «يۋۆەنتۋس» فۋتبول كلۋبىنا اۋىسقاننان كەيىن مەديتسينالىق تەكسەرۋدەن ءوتتى.

فۋتبولشىنىڭ دەنساۋلىعى تۋريندىك دارىگەرلەردى تاڭعالدىردى. «رونالدۋدىڭ فيزيكالىق جاعدايىن 20 جاستاعى سپورتشىنىڭ دەنساۋلىعىمەن سالىستىرۋعا بولادى»، -  دەپ جازدى جۋرناليست ماتتەو بونەتتي ءوزىنىڭ Twitter پاراقشاسىندا.

تەست ناتيجەلەرىنە قاراعاندا رونالدۋدىڭ اعزاسىندا مايدىڭ كورسەتكىشى بار-جوعى 7 پايىز. ال، بۇل قالىپتى سپورتشىلاردا ورتا ەسەپپەن 10-11 پايىزدى قۇرايدى ەكەن. 33 جاستاعى پورتۋگاليالىق شابۋىلشى رەسەيدە وتكەن الەم چەمپيوناتىندا ساعاتىنا 34 شاقىرىمدىق جىلدامدىقپەن جۇگىرگەن. بۇل دا سول چەمپيوناتتاعى ەڭ جوعارعى كورسەتكىشتەردىڭ ءبىرى. ەستەرىڭىزگە سالا كەتەيىك، ايگىلى فۋتبولشى كريشتيانۋ رونالدۋ مادريدتىڭ «رەالىنان» تۋريننىڭ «يۋۆەنتۋس» كلۋبىنا 10 -شىلدە كۇنى اۋىسقان بولاتىن.

پورتۋگالدىق سۇرمەرگەن «يۋۆەنتۋس» كومانداسىمەن ءتورت جىلدىق كەلىسىمشارتقا قول قويعان. جىلىنا 30 ميلليون ەۋرو كولەمىندە ەڭبەكاقى الادى. «يۋۆەنتۋس» فۋتبولشىنىڭ ترانسفەرلىك قۇنىنا 100 ميلليون ەۋرو شىعىنداعان.

رونالدۋ «رەال» فۋتبول كلۋبى ساپىندا 438 ويىنعا قاتىسىپ، 451 گول سوعىپ، كوماندا تاريحىنداعى ەڭ ۇزدىك سۇرمەرگەن اتاندى. ونىڭ «يۋۆەنتۋس» ساپىنداعى العاشقى دەبيۋتتىك ويىنى 12 -تامىزدا وتەدى.