ۆەلوسيپەدشىلەر وزىمەن بىرگە قۇجاتتارىن الىپ ءجۇرۋى كەرەك پە؟
بۇل تۋرالى Tengrinews.kz حابارلايدى.
«قازىرگى ۋاقىتتاعى زاڭناماعا سايكەس، ۆەلوسيپەدتى كولىك قۇرالى رەتىندە جانە ۆەلوسيپەدشىنى مەملەكەتتىك تىركەۋگە تۇرعىزۋعا بولمايدى. ۆەلوسيپەدشى وزىمەن بىرگە قانداي دا ءبىر قۇجات الىپ جۇرۋگە مىندەتتى ەمەس»، - دەپ حابارلادى ءى ءى م اكىمشىلىك پوليتسيا كوميتەتىنىڭ وكىلدەرى Facebook جەلىسىندەگى پاراقشاسىندا.
سونداي-اق، ۆەدومستۆو وكىلدەرى پوليتسيا وكىلدەرىندە ۇرلانعان ۆەلوسيپەدتەر جايلى مالىمەت بولعان جاعدايدا ۆەلوسيپەدتىڭ سەريالىق ءنومىرىن تەكسەرە الاتىندارىن ايتىپ ءوتتى. مۇنىڭ الدىندا استانا ءى ءى د وكىلدەرى ۆەلوسيپەد قۇجاتىن تالاپ ەتكەن پوليتسەيدىڭ ارەكەتىن تۇسىندىرگەن ەدى.
ەسكە سالا كەتەيىك، وسىعان دەيىن استانالىق پوليتسيا قىزمەتكەرلەرىنىڭ تۇرعىنداردان ۆەلوسيپەد قۇجاتىن كورسەتۋدى تالاپ ەتكەنى تۇسىرىلگەن ۆيدەو تارالعان ەدى. «ۆەلوسيپەد قۇرالىن سىزگە ساتقان كەزدە كوك كىتاپشا بەرىلەدى. كىتاپشادا ءنومىر كورسەتىلەدى. ساندار سايكەس بولۋى كەرەك. كەلەڭسىز جاعداي تۋماۋى ءۇشىن ول كىتاپشانى ءاردايىم وزىمەن بىرگە الىپ ءجۇرۋ كەرەك»، - دەپ تۇسىندىرگەن ەدى ۆيدەودا پوليتسيا قىزمەتكەرى.
