قازاقستاندىق تاەكۆوندوشىلار قىتايدا الەم كۋبوگىنا قاتىسادى

استانا. قازاقپارات - تاەكۆوندودان قازاقستان قۇراماسى قىتايدىڭ ۋسي قالاسىندا وتەتىن كوماندالىق ەسەپتەگى الەم كۋبوگىنا قاتىسادى، دەپ حابارلايدى قازاقپارات ءتىلشىسى.

ق ر ۇ و ك باسپا ءسوز قىزمەتى حابارلاعانداي، اتالعان دودا 25- شىلدە كۇنى قىتايدىڭ ۋسي قالاسىندا وتەدى. وندا قازاقستان نامىسىن ايتۋار شايكەنوۆ، نۇرسۇلتان مامايەۆ، لەس ابدۋساممات، دۇيسەباي سمايىل قورعايدى.

كوماندالىق ەسەپتەگى الەم كۋبوگى G8 ساناتىنداعى تۋرنيرگە جاتادى. بۇل جارىسقا قاتىسىپ، جەڭىسكە جەتكەن سپورتشىلار الەمدىك رەيتينگتەگى جاعدايىن دا ءبىراز جاقسارتا تۇسپەك.

قازاقستان تاەكۆوندو فەدەراتسياسىنىڭ ۆيتسە-پرەزيدەنتى ارمان شىلمانوۆتىڭ ايتۋىنشا كوماندالىق ەسەپتەگى الەم كۋبوگىنا رەيتينگتەگى ۇزدىك 16 كوماندا عانا قاتىسا الادى. قازاقستان قۇراماسى 10-ورىندا تۇر. تاەكۆوندودان نەگىزگى قۇرام دجاكارتادا وتەتىن ازيا ويىندارىنا دايىندالۋ ۇستىندە. ال قىتايعا بارا جاتقان سپورتشىلار ءوز سالماقتارىنىڭ ۇزدىگى بولعانىمەن ولار سىنعا تۇسەتىن سالماق دارەجەلەرى ازيادا ويىندارىنىڭ باعدارلاماسىنا ەنبەگەن.

قازاقستان قۇراماسى الەم كۋبوگىنا دايىندىق كەزەڭىن استانادا وتكىزدى. بۇگىن تۇندە ولار قىتايعا ۇشىپ كەتەدى.

اۆتور: كۇنسۇلتان وتارباي