الماتى پوليتسياسىنىڭ قىزمەتى تەكسەرىلەدى - ءى ءى م

استانا. قازاقپارات - الماتى قالاسىنىڭ ىشكى ىستەر دەپارتامەنتىنىڭ قىزمەتىنە تەكسەرۋ جۇرگىزىلەدى، دەپ حابارلايدى قازاقپارات ق ر ىشكى ىستەر ءمينيسترىنىڭ ورىنباسارى راشيد جاقىپوۆقا سىلتەمە جاساپ.

«الماتى قالالىق ىشكى ىستەر دەپارتامەنتى باسشىسىنىڭ جاۋاپكەرشىلىگى ماسەلەسىنە كەلسەك، قازىرگى ۋاقىتتا ق ر ىشكى ىستەر مينيسترلىگى الماتى ءى ءى د قىزمەتىنە تەكسەرۋ جۇمىستارىن جۇرگىزىپ جاتىر. ءى ءى د جەتەكشىلىگىنىڭ جاۋاپكەرشىلىگى مينيسترلىك دەڭگەيىندە وسى تەكسەرۋ ناتيجەسىندە قارالاتىن بولادى»، - دەدى راشيد جاقىپوۆ دەنيس تەن ءولىمىن تەرگەۋگە ارنالعان بريفينگتە جۋرناليستەر سۇراعىنا بەرگەن جاۋابىندا.

ايتا كەتسەك، قازاقستاندىق مانەرلەپ سىرعاناۋشى دەنيس تەن 19- شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى بايسەيىتوۆا كوشەلەرىنىڭ قيىلىسىندا 19- شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.

2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.