الۆارەس دوپينگ قولدانۋىنىڭ باستى سەبەبىن ايتتى
الۆارەس مەكسيكالىق سپورتشىلاردىڭ كوپشىلىگى ەتتىڭ قۇرامىنداعى كلەنبۋتەرولدىڭ كوپ بولۋىنان جابىرلەنگەنىنە قاراماستان، وسى ماسەلەگە جەتە ءمان بەرمەگەنىن مويىنداعان.
«وسىعان قاتىستى جاڭالىقتاردىڭ تاقىرىبىنا كوزىم ءتۇسىپ ەدى، ءبىراق ءىشىن اشىپ وقىماپپىن. بۇل - مەنىڭ كەمشىلىگىم. مەن وسىنى ءوز كومانداما ەسكەرتۋگە ءتيىس ەدىم. مەندە بۇرىن بۇلاي بولماعان. وكىنىشكە قاراي، وسى جولى كەزەك ماعان كەلدى. بۇرىن ءبىراز بوكسشىنىڭ كلەنبۋتەرولعا تاپسىرعان سىناماسى وڭ ناتيجە بەرگەنىن ءبىلۋشى ەدىم، ءبىراق وعان قاتتى ءمان بەرمەگەن. بۇل - مەنىڭ جاۋاپسىزدىعىم»، - دەدى ول.
بوكسشى ارنايى دوپينگ قابىلداماعانىن تىلگە تيەك ەتتى.
«مەن ەشقاشان سانالى تۇردە دوپينگ قولدانعان ەمەسپىن. جەكپە-جەك ءۇشىن ماعان تىيىم سالىنعان زاتتاردىڭ تۇك قاجەتى جوق. مەن ەشقاشان مۇنداي قادامعا بارمايمىن، ويتكەنى مەن ادال اداممىن، ءوز كاسىبىمدى قۇرمەتتەيمىن. بوكس - مەنىڭ ءومىرىم، ونىڭ ماسقارا بولۋىن قالامايمىن. ونى مەنىڭ بالالارىم كورەدى، سوندىقتان مۇنداي ارەكەت جاسامايمىن»، - دەيدى «كانەلو» ESPN Deportes-كە بەرگەن سۇحباتىندا.
ەسكە سالا كەتسەك، ساۋل الۆارەس نيەۆادا شتاتى اتلەتيكالىق كوميسسياسىنىڭ (NSAC) شەشىمىمەن ۋاقىتشا سپورتتان شەتتەتىلگەن ەدى.
ناۋرىز ايىنىڭ باسىندا ساۋل الۆارەستەن الىنعان دوپينگ-سىنامالاردىڭ بىرىنەن تىيىم سالىنعان پرەپارات تابىلدى. ونىڭ مۇددەسىن قورعايتىن Golden Boy پروموۋتەرلىك كومپانياسى بوكسشىنىڭ قان قۇرامىنان تىيىم سالىنعان پرەپارات - كلەنبۋتەرول تابىلعانى تۋرالى اقپاراتتى راستادى.
