قازاقستاندىق گرەك-ريم شەبەرلەرى ازيا بىرىنشىلىگىن ەكىنشى ورىندا اياقتادى

استانا. قازاقپارات - ءۇندىستاننىڭ نيۋ-دەلي قالاسىندا ءوتىپ جاتقان كۇرەس تۇرلەرىنەن جاستار اراسىنداعى ازيا چەمپيوناتىنىڭ ەكىنشى كۇنى جاس بالۋاندارىمىز ەل قورجىنىنا ەكى التىن، ءبىر قولا مەدال سالدى، دەپ حابارلايدى قازاقپارات ءتىلشىسى.

ق ر كۇرەس تۇرلەرى فەدەراتسياسىنىڭ باسپا ءسوز قىزمەتى ءمالىم ەتكەندەي، العاشقى التىندى گرەك-ريم كۇرەسىنىڭ شەبەرى عالىم قابدىناساروۆ جەڭىپ الدى. ول 60 كەلى سالماقتا ەل نامىسىن قورعاعان بولاتىن. وتانداسىمىز فينالدا يراندىق قارسىلاسىن ۇتىپ، ازيا چەمپيونى اتانسا، ەكىنشى التىندى ەل قورجىنىنا 67 كەلىدە كۇرەسكەن بالۋان مەرەي بەكەنوۆ سالدى. ول التىن مەدال ءۇشىن بولعان بەلدەسۋدە قىرعىزستاندىق بالۋاننان ايلاسىن اسىردى.

ال 82 كەلى سالماقتا كۇرەسكەن ستانيسلاۆ رىلسكي ازيا چەمپيوناتىنىڭ قولا جۇلدەگەرى اتاندى.

وسىلايشا، ازيا چەمپيوناتىنىڭ العاشقى ەكى كۇنىندە بوزكىلەمدە بەلدەسكەن گرەك-ريم كۇرەسىنىڭ بالۋاندارى جارىستى اياقتادى.

ەستەرىڭىزگە سالا كەتەيىك، كەشە گرەك-ريم كۇرەسىنەن جاس بالۋاندارىمىز جارىستىڭ العاشقى كۇنى 4 مەدال جەڭىپ العانى تۋرالى ايتقان بولاتىنبىز. مىنە، جارىستىڭ ەكى كۇننەن كەيىنگى ناتيجەسىن قوسا ەسەپتەگەندە قازاقستاننىڭ جاس بالۋاندارى 2 التىن، 5 قولا مەدالمەن كوماندالىق ەسەپتە ەكىنشى ورىنعا يە بولدى. ءبىرىنشى ورىندا - يران. ۇزدىك ۇشتىكتى قىرعىزستان بالۋاندارى قورىتىندىلادى. بۇگىن بوزكىلەمگە ەركىن كۇرەس شەبەرلەرى شىعادى.

اۆتور: كۇنسۇلتان وتارباي