گولليۆۋدتا «باستاۋ» دومبىراشىلار توبى التىن مەدالعا يە بولدى
بۇل تۋرالى توپ پروديۋسەرى الپامىس ءشارىم ايتتى، دەپ حابارلايدى قازاقپارات ءتىلشىسى.
«بۇل جولدى ءجۇرىپ ءوتۋ قانشالىقتى قيىن ەكەنىن بىلسەڭىزدەر عوي. ءسۇيىنشى! قازاقتىڭ قارا دومبىراسى Hollywood ساحناسىنا شىقتى. «باستاۋ» دومبىراشىلار توبى ءوز نوميناتسيالارىندا التىن مەدالعا يە بولدى. جەڭىسىمىزدى بيىلعى «ۇلتتىق دومبىرا كۇنىنە» ارنايمىز. ءبىزدى قولداعان قازاق ۇلتتىق ۋنيۆەرسيتەتىنىڭ رەكتورى، ونەر جاناشىرى ايمان مۇساحودجايەۆا حانىمعا مىڭ العىس»، - دەدى «باستاۋ» توبىنىڭ پروديۋسەرى الپامىس ءشارىم.
orld Championship of Performing Arts - WCOPA حالىقارالىق تالانتتار وليمپياداسى. دەڭگەيى جاعىنان WCOPA دۇنيەجۇزىلىك وليمپيادا ويىندارىمەن تەڭ. ونەر دوداسىنا ءار مەملەكەتتىڭ ەڭ تالانتتى دەگەن ونەرپازدارى قاتىسادى.
الەمدىك شوۋ-بيزنەستىڭ استاناسى لوس-اندجەلەستە وسىمەن 22- رەت ۇيىمداستىرىلعان وليمپيادادا 72 مەملەكەتتىڭ وكىلدەرى باق تالاستىردى. قازاقستان اتالعان جارىسقا العاش رەت قاتىسىپ وتىر.
«بيىل قازاقستان العاش رەت قاتىسۋدا، كەلەسى جىلدان باستاپ ۇلتتىق قۇرامانىڭ «باس باپكەرى» رەسمي وكىلى ەتىپ مەنى تاعايىندادى. 20 جىلدان استام تاريحى بار بايقاۋدىڭ اشىلۋىنا ءتۇرلى ەلدىڭ پرەزيدەنتتەرى قاتىسادى. مەملەكەتتىك ماڭىزى بار شارانىڭ دەڭگەيىن ءبىزدىڭ ەلدە دە كوتەرىپ، كوك تۋىمىزدى الەمدىك ارەنالاردا جەلبىرەتۋ ءۇشىن بارىمىزدى سالامىز. بۇل قازاق ونەرپازدارىنىڭ الەمدىك ارەناعا كورىنۋىنە ۇلكەن جول، ۇلكەن مۇمكىندىك، - دەدى ا. ءشارىم.
