كومىر باعاسىن كوتەرگەندەر ميلليونداپ ايىپپۇل تولەيدى
ق ر ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ اقمولا وبلىستىق دەپارتامەنتى تاراپىنان تەكسەرىس جۇرگىزىلدى.
وندا «كوسىگين» ج ك، «جولدىقوۆ» ج ك، «قازاقستاننىڭ بولشەك كومىر جەلىسى» ج ش س، «يۆۆي» ج ش س، «سيەۆەرەنەرگوۋگول سناب» ج ش س ءوزارا كەلىسە وتىرىپ، 2017-جىلدىڭ ناۋرىز-ءساۋىر، تامىز-قازان ايلارىندا كوكشەتاۋدا كومىر باعاسىن ەش نەگىزسىز كوتەرگەنى جانە ۇستاپ تۇرعانى انىقتالدى.
وسىلايشا، ولار ق ر ا ق ب ك 159- بابىنىڭ 2- بولىگىنە سايكەس زاڭ بۇزۋشىلىق جاساعان.
سول كەزەڭدە تۇرعىندار تاراپىنان كومىردىڭ تاپشىلىعى تۋرالى كوپتەگەن شاعىم تۇسكەن. كومىر ساتاتىن ورىنداردا كومىردىڭ تاپشىلىعىن پايدالانىپ، كوتەرمە ساۋدا-ساتتىق جاساۋشىلار ونىڭ باعاسىن ەش نەگىزسىز كوتەرگەن.
«قۇزىرەتتى ورگاندار نارىق سۋبەكتىلەرى ۇسىنعان ماتەريالداردى زەرتتەي كەلە، تەكسەرىس جۇرگىزىلگەن مەرزىمدە جەتكىزىپ بەرۋشىلەر تاراپىنان كومىر باعاسىندا وزگەرىس بولماعانىن انىقتادى. بۇعان قوسا، سالىق جانە ق ر وزگە دە زاڭناماسىندا، تۇتىنۋ ديناميكاسىندا، تابيعي مونوپوليالار سۋبەكتىلەرىنىڭ قىزمەت كورسەتۋ تاريفىندە، وندىرىستە قولدانىلاتىن تاۋارلار جانە شيكىزات باعاسىندا وزگەرىستەر بولعان جوق، سونداي-اق، ايتىلعان مەرزىمدە تاۋار ساتۋ دا جۇرگىزىلمەگەن»، - دەپ كورسەتىلگەن قاۋلىدا.
وسىعان وراي، قاراعاندىلىق «كوسىگين» ج ك- گە 3,416 ميلليون تەڭگە ايىپپۇل سالىندى. زاڭسىز تۇسكەن تابىس 23,3 ميلليون تەڭگە اقشاسى مەملەكەتكە كىرىس رەتىندە تاركىلەندى.
سونىمەن قاتار، استانالىق «سيەۆەرەنەرگوۋگول سناب» ج ش س- نا 2,9 ميلليون تەڭگە كولەمىندە ايىپپۇل سالىندى.
بۇلاردىڭ دا زاڭسىز تاپقان 27,8 ميلليون تەڭگە اقشاسى مەملەكەتكە كىرىس رەتىندە تاركىلەندى.