سىر ءوڭىرىنىڭ سىيلىعى ەلوردانىڭ كورنەكتى ورىنداردىڭ بىرىنە اينالادى - ەلباسى

 قىزىلوردا. قازاقپارات - قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ اتىنان قىزىلوردا وبلىسىنىڭ اكىمى قىرىمبەك كوشەربايەۆ العىس حات الدى، دەپ حابارلايدى قازاقپارات ءتىلشىسى وبلىس اكىمدىگىنىڭ باسپا ءسوز قىزمەتىنە سىلتەمە جاساپ.

مەملەكەت باسشىسى ءوزىنىڭ العىس حاتىندا سىر ءوڭىرى تۇرعىندارىن استانا قالاسىنىڭ 20 جىلدىعى مەرەكەسىمەن قۇتتىقتاپ، ءوزىنىڭ جۇرەكجاردى لەبىزىن بىلدىرگەن.

ەلباسى ءوزىنىڭ قۇتتىقتاۋ حاتىندا «قۇرمەتتى قىرىمبەك ەلەۋ ۇلى! ءسىزدى جانە بۇكىل قىزىلوردا وبلىسىنىڭ جۇرتشىلىعىن استانانىڭ 20 جىلدىعىمەن شىن جۇرەكتەن قۇتتىقتايمىن! تاۋەلسىز قازاقستاننىڭ سيمۆولى سانالاتىن باس قالامىزدىڭ ايتۋلى مەرەيتويى - بارشا قازاقستاندىقتارعا ورتاق قۋانىش. سارىارقا توسىنە قازىعىن قاققان ەڭسەلى ەلوردامىزدى تۇرعىزۋعا بۇكىل حالقىمىز جۇمىلا اتسالىستى.

بيىل باس قالانىڭ تۋعان كۇنىنە وراي «وڭىرلەردىڭ استاناعا تارتۋى» جوباسى اياسىندا قىزىلوردا وبلىسى دا ەرەكشە سىي جاسادى.

زىمىراندىق- عارىشتىق تەحنيكانىڭ اشىق اسپان استىنداعى مۋزەيى قازاقستاننىڭ عارىش سالاسىندا جەتەكشى مەملەكەتتەردىڭ ءبىرى ەكەنىن ايعاقتايتىن تاماشا تارتۋ بولدى.

سىر ءوڭىرى جۇرتشىلىعىنىڭ بۇل سىيلىعى قالا تۇرعىندارى مەن قوناقتارى ءۇشىن قىزىقتى ءارى كورنەكتى ورىنداردىڭ بىرىنە اينالاتىنىنا سەنىمدىمىن.

استانانى كوركەيتۋگە زور ۇلەس قوسقان سىزگە جانە بۇكىل قىزىلوردا وبلىسىنىڭ تۇرعىندارىنا شىنايى ريزاشىلىعىمدى بىلدىرەمىن.

سىزدەرگە زور دەنساۋلىق، باق- بەرەكە تىلەيمىن!» ، - دەلىنگەن قۇتتىقتاۋ حاتىندا.

مەرەيلى مەرەكە قارساڭىندا قىزىلوردالىقتار ەلوردادا زىمىراندى- عارىشتىق تەحنيكانىڭ اشىق اسپان استىنداعى مۋزەيىن تارتۋ ەتتى. ول استانانىڭ سول جاعالاۋ بولىگىندە ورنالاسقان. جالپى اۋماعى - 1,4 گەكتار. وندا شىنايى ولشەمدە جاسالعان «سويۋز» ، «پروتون» ، «زەنيت» زىمىران- تاسىعىشتارى ورناتىلدى. جاقىن ارادا «بۋران» وربيتاارالىق كەمەسىنىڭ ماكەتى قويىلادى، ەكسپوزيتسيا ماڭىنداعى ايماق اباتتاندىرىلدى. سونداي- اق، كەشەن اۋماعىندا زىمىرانداردىڭ تەحنيكالىق سيپاتتاماسى، جاسالۋى جانە پايدالانۋ تاريحى تۋرالى بارلىق مالىمەتتەر كورسەتىلگەن ارنايى اقپاراتتىق ستەندتەر قويىلدى.