قىتايلىق جىگىت قازاقستاننىڭ ءانۇرانىن ورىندادى - كەسكىن
ول قازاق ءتىلىن ارنايى كۋرستارعا قاتىسپاي، شىنجاڭدىق دوستارىنان ۇيرەنگەن ەكەن. ليۋي تەك قازاق ءتىلىن عانا ەمەس، سونىمەن قاتار باسقا دا شەت تىلدەردى وزدىگىمەن ۇيرەنگەن.
«قازاق تىلىمەن تانىسۋىم ۋنيۆەرسيتەتكە قابىلدانعان كەزدەن باستالدى. ول كەزدە جاتاقحانادا تۇراتىنمىن. كورشىم نۇرلان دەگەن شىنجاڭدىق قازاق بولدى. ول قىتايشا وتە جاقسى سويلەيتىن. بىردە ونىڭ وزگە تىلدە سويلەگەنىن ەستىپ، بىردەن قىزىعۋشىلىعىم وياندى. بۇل ءتىل جايلى سۇراپ، ۇيرەتۋىن ءوتىندىم. ول بىردەن كەلىستى. سودان سوڭ قازاق ءتىلى دەگەن كىتاپ ساتىپ الىپ، وقي باستادىم. نۇرلان كيريلل ارىپتەرىن بىلمەگەندىكتەن، ەرەجەلەردى ءوز بەتىممەن وقىپ، ۇيرەنۋگە تۋرا كەلدى. كيريلل ارىپتەرىن مەكتەپتە جۇرگەندە ازداپ وقي الاتىنمىن، سوندىقتان ول جاعىنان اسا قيىنشىلىق تۋعان جوق. قازاق ءتىلىنىڭ ارقاسىندا كوپتەگەن قازاق دوستار تاپتىم. ولارمەن ۇيرەنگەن دۇنيەمدى پىسىقتاپ وتىردىم» ، - دەگەن ليۋي شياڭ.
