كوشى-قون زاڭىن بۇزعان نيگەريا ازاماتى ەلىنە جەتە الماي ءجۇر
ول كوشى-قون زاڭناماسىن بۇزىپ، قازاقستاندا تۇرۋ ۋاقىتىن وتكىزىپ العان، دەپ حابارلايدى قازاقپارات ءتىلشىسى.
34 جاستاعى نيگەريا ازاماتى ماناس وگارايو اقتوبە قالاسىنداعى تەمىرجول ۆوكزالى ماڭىندا قوناق ۇيدە جاتىر. اقشاسى تاۋسىلعان شەتەلدىك ازاماتتى جەرگىلىكتى تۇرعىن ءوز قامقورلىعىنا العان. ال سول ۆوكزال ماڭىنداعى ادامدار ونى تەگىن تاماقتاندىرىپ وتىر. وتباسىمەن الەۋمەتتىك جەلى ارقىلى حابارلاسىپ، حات الىسىپ وتىرادى. سەبەبى، تەلەفون شالۋعا اقشاسى جەتپەيدى.
«وتانىما ورالۋدى ارماندايمىن. مەن اقتوبەدە جۇرگەندە اكەم كوز جۇمدى، اپام اۋىر حالدە جاتىر. قازىر اقشام جوق، دەنساۋلىعىم دا سىر بەرە باستادى. شىنىمدى ايتقاندا، ەلىمە ورالسام مەنەن باقىتتى جان بولماس ەدى»، - دەدى ماناس وگارايو.
شەتەلدىك ازامات اقتوبەگە اعىلشىن تىلىنەن ساباق بەرۋگە كەلگەن. ينتەرنەتتەگى حابارلاما ارقىلى تابىس تابۋعا كەلگەن ماناس وگارايو جۇمىس بەرۋشىمەن كەلىسە الماي، قازاقستاندا بولۋ ۋاقىتىن وتكىزىپ الدى.
«كوشى-قون زاڭناماسىن بۇزعانى ءۇشىن نيگەريا ازاماتىنا قاتىستى قازاقستان اۋماعىنان شىعارۋ تۋرالى اقتوبە قالالىق اكىمشىلىك سوتىنىڭ شەشىمى شىقتى. قازىرگى كەزدە وبلىستىق ءى ءى د كوشى- قون قىزمەتى وسى ماسەلەمەن شۇعىلدانىپ جاتىر»، - دەدى اقتوبە وبلىستىق ءى ءى د باسپا ءسوز قىزمەتىنىڭ جەتەكشىسى ەربولات سارقۇلوۆ.
اكىمشىلىك ءىس قوزعالىپ، سوت شەشىمى شىقتى. ەندى ماناس وگارايو ەل اۋماعىنان اكىمشىلىك جولمەن شىعارىلادى. ال وعان دەيىن اقتوبەلىكتەر شەتەلدىك ازاماتتى قامقورلىعىنا الماق.
«شەتەلدىك ازاماتتى كوشەدە كەزىكتىردىم. بارىپ سۇراپ، باسىنا تۇسكەن ءىستى ءبىلدىم. كەيىن كومەكتەسۋگە شەشىم قابىلداپ، قامقورلىعىما الدىم. ونىڭ ارمانى - ەلىنە ورالۋ»، - دەدى قالا تۇرعىنى باۋىرجان مولشىبايەۆ.
