وڭتۇستىك افريكا ەلىندە ۇشاق اپاتقا ۇشىرادى

استانا. قازاقپارات - سەيسەنبى كۇنى وڭتۇستىك افريكا رەسپۋبليكاسىنىڭ استاناسى - پرەتوريانىڭ ۆاندەربۋم اۋەجايىنا جاقىن ماڭدا ۇشاق اپاتى بولدى.

سالدارىنان كەم دەگەندە ءبىر ادام قازا بولىپ، تاعى 20 عا جۋىعى زارداپ شەكتى. بۇل تۋرالى جەرگىلىكتى شۇعىل مەديتسينالىق قىزمەتتىڭ Twitter- دەگى پاراقشاسىندا ايتىلدى، دەپ حابارلايدى ت ا س س.

«ۆاندەربۋمدەگى اۋە اپاتى سالدارىنان ءبىر ادامنىڭ قازا بولعانى حابارلانۋدا»، - دەلىنگەن اقپاراتتا.

وڭتۇستىك افريكالىق «ايۋيتنەس نيۋس» راديوستانساسى اۋەجاي وكىلىنە سىلتەمە جاساپ حابارلاۋىنشا، ۇشاق چارتەرلىك رەيسپەن جۇكتەردى تاسىمالداپ كەلە جاتقان جانە اپاتقا ۇشىراعان كەزدە فابريكانىڭ عيماراتىنا سوعىلعان. وقيعاعا قوزعالتقىشتاردىڭ ءبىرىنىڭ ىستەن شىعۋى سەبەپ بولۋى مۇمكىن.

News24 جاڭالىقتار پورتالىنىڭ مالىمەتىنشە، ۇشاق چارتەرلىك جۇك تاسىمالدارىن ورىندايتىن MAC Martin's Air Charter گوللانديالىق كومپانياسىنا تيەسىلى. وقيعا ورنىندا اپاتتىق قىزمەتتەر، جەدەل جاردەم ماماندارى جانە قۇتقارۋشىلار جۇمىس ىستەۋدە. اۋە كەمەسىنىڭ بورتىندا بولعان 20 عا جۋىق ادام زارداپ شەكتى.