ۆەتنام راديوسىندا قازاق اندەرى شىرقالادى
بۇل تۋرالى «قازاق راديولارى» ج ش س باس ديرەكتورى ءمادي ماناتبەك ۇلى مەن ۆەتنامدىق VOV3 مۋزىكالىق ارناسى ديرەكتورىنىڭ ورىنباسارى Tran Nhat Duong استانادا ءوتىپ جاتقان «ازيانىڭ مەديا ديالوگى» فورۋمىندا ۋاعدالاستى. ودان بولەك، قوس تاراپ مادەنيەت پەن تۋريزمدى دامىتۋعا باعىتتالعان تىڭ جوبالار ازىرلەۋدى جوسپارلاپ وتىر.
«ۆەتنام راديوسى «قازاق راديولارى» سەرىكتەستىگى سەكىلدى الەۋمەتتىك جانە قوعامدىق باعىتتا جۇمىس ىستەيدى ەكەن. ۆەتنامدىقتاردى ءبىزدىڭ ۇلتتىق جانە كلاسسيكالىق مۋزىكامىز قىزىقتىرىپ وتىر. ال، بىزگە ولاردىڭ تۋريزم باعىتىنداعى باعدارلاماسى كەرەك. ويتكەنى، ۆەتنام - قازاقستان ءۇشىن ءالى تولىق تانىلىپ ۇلگەرمەگەن ەل. سوندىقتان، ەكى ەلدىڭ راديولارى مادەنيەت جانە ساياحات سالاسىن قال- قادەرىنشە دارىپتەۋگە كەلىستىك»، - دەدى «Qazaq radiolary» ج ش س باس ديرەكتورى ءمادي ماناتبەك ۇلى.
ءوز كەزەگىندە ءوز ويىن ورتاعا سالعان VOV مۋزىكالىق ارناسى ديرەكتورىنىڭ ورىنباسارى Tran Nhat Duong مىرزا بۇل ۋاعدالاستىقتىڭ ەكى ەل اراسىنداعى مادەنيەت پەن تۋريزمنىڭ دامۋىنا ىقپال ەتەتىنىن اتاپ ءوتتى.
«قازاق ەلىندە تابىستى كەلىسىم جاساعانىمىزعا قۋانىشتىمىز. قۇشاق جايا قارسى العاندارىڭىزعا ايتار العىسىمىز شەكسىز. بولاشاقتا وسى كەزدەسۋدىڭ قورىتىندىسى بويىنشا ەكى تاراپ ىنتىماقتاستىق تۋرالى مەموراندۋمعا قول قوياتىن بولادى. بۇل قۇجات - ەكى ەلدىڭ مەملەكەتتىك راديولارى اراسىنداعى بايىپتى بايلانىستىڭ بەرىك ىرگەتاسى بولىپ قالاناتىنىنا سەنىمدىمىز. ەكىجاقتى كەلىسىم بولاشاقتا مادەنيەت پەن تۋريزمنىڭ دامۋىنا وزىندىك سەپتىگىن تيگىزەدى دەپ ويلايمىز. كەزدەسۋگە شاقىرعاندارىڭىزعا راحمەت! كەزدەسۋ قورىتىندىسى بويىنشا كوپ كۇتتىرمەي بىرلەسكەن جۇمىستى باستاۋعا كىرىسەمىز»، - دەپ ريزاشىلىعىن ءبىلدىردى ول.
ەسكە سالا كەتسەك، استانادا تۇڭعىش رەت راديونى دامىتۋ ماسەلەلەرىنە ارنالعان «Radio Asia 2018» حالىقارالىق كونفەرەنسياسى ءوتىپ جاتىر. وعان ءۇندىستان، مالديۆ، ۆەتنام، قىتاي، اۋعانستان، تۇرىكمەنستان، تۇركيا، يندونەزيا سىندى ازيا ەلدەرىنىڭ راديوجۋرناليستەرى كەلدى.
اۆتور: ايجان سەرىكجان قىزى
