اتىراۋ وبلىسىندا بالىقتار قىرىلىپ جاتىر

اتىراۋ. قازاقپارات - اتىراۋ وبلىسىندا بالىقتار قىرىلىپ قالدى، دەپ حابارلايدى قازاقپارات.

بالىقتاردىڭ جىلىوي اۋدانى ارقىلى وتەتىن جاڭعىلدىكول وزەنىنىڭ اۋماعىنان 20 گەكتار جەردە قىرىلىپ جاتقانىن تۇرعىزبا اۋىلىنىڭ تۇرعىندارى حابارلاعان.

«بولعان وقيعا تۋرالى حابار جەتىسىمەن ارنايى كوميسسيا قۇرىلىپ، ونىڭ قۇرامىنا اتىراۋ وبلىستىق ورمان شارۋاشىلىعى جانە جانۋارلار الەمى وبلىستىق اۋماقتىق ينسپەكسياسى مەن وزگە دە جاۋاپتى ورگانداردىڭ قىزمەتكەرلەرى كىردى. الدىن الا قورىتىندى بويىنشا كوكتەمدە سۋ كولەمى وتە از بولدى. تاياز وزەننىڭ سۋى كۇننىڭ قىزۋىنا قاتتى جىلىپ كەتكەن. سونىڭ سالدارىنان بالىقتار قىرىلعان بولۋى مۇمكىن. الايدا، ناقتى جاۋاپ كوميسسيا مۇشەلەرى زەرتحانالىق زەرتتەۋلەر جۇرگىزىپ بولعان سوڭ بەلگىلى بولادى»، - دەپ حابارلادى جىلىوي اۋدانى اكىمدىگىنىڭ وكىلدەرى.

ايتا كەتەيىك، اتىراۋ وبلىسىندا شىلدە ايىنىڭ باسىنان بەرى اۋا تەمپەراتۋراسى وتە جوعارى بولدى. كەيبىر اۋدانداردى تەرمومەتر باعاندارى 45-46 گرادۋسقا دەيىن جەتتى.