الىپ ءتيىن الماتىنىڭ سيمۆولىنا اينالماۋى مۇمكىن

الماتىلىقتاردىڭ الىپ ءتيىن اينالاسىنداعى پىكىرى ەكىگە جارىلۋدا. الىپ تا بولسا، كوزدەرى مولدىرەگەن جانۋاردى بىرەۋلەر جاقسى كورىپ جاتسا، ەندى ءبىرى ونىڭ نەگە كەرەك ەكەنىن تۇسىنبەي، ازىلگە اينالدىرۋدا.

 جوبانىڭ باس ۇيىمداستىرۋشىسى - قالانى بەزەندىرۋ جۇمىستارىن جۇرگىزەتىن FUNK كرەاتيۆتى اگەنتتىگى. اگەنتتىكتىڭ ۇيىمداستىرۋىمەن «الماتى - تيەپلىي گورود» جوباسى اياسىندا قالا اكىمدىگىنە 11 ساۋلەت نىسانى ۇسىنىلعان. قالانى بەزەندىرۋ ماقساتىندا اگەنتتىك وتكىزگەن بايقاۋدا بريتاندىق سۋرەتشى الەكس رينسلەردىڭ جوباسى ۇزدىكتەر قاتارىنا ىلىنگەن.

اتالعان ۇيىم باسشىسىنىڭ ايتۋىنشا، بريتاندىق سۋرەتشى الەكس رينسلەر - الىپ جانۋارلاردىڭ ءمۇسىنىن جاسايتىن تانىمال شەبەر. ونىڭ ينستاللياتسياسى لوندون مەن شاڭحاي تۇرعىندارىنا جاقسى تانىس. الايدا بۇعان دەيىن تەك تۇلكىنىڭ ءپىشىنىن جاساپ كەلگەن سۋرەتشى «الماتىلىق ءتيىندى» تاجىريبەسىندە العاش قولدانىپ وتىر. بيىكتىگى 13 مەترگە جەتەتىن «ءداۋ ءتيىن» ءمۇسىنى الەم بويىنشا الىپ سكۋلپتۋرالاردىڭ ءبىرى سانالادى.

 

«الەكس رينسلەر ءار قالادا قانداي جانۋار ءومىر سۇرەتىنىن باقىلاپ، سونىڭ ناتيجەسىندە ەكو- ارت نىسان جاساپ شىعارادى. ول الماتىعا كەلىپ ەكولوگيالىق ورىندار - باقتار مەن ساياباقتاردى ارالاپ، وندا كوبىنە قانداي جانۋارلار ءومىر سۇرەتىنىن زەرتتەدى. مۇندا باسقا قالالارداعىداي مىسىق تا، ءيت تە، تىشقان دا جەتەدى. الايدا ءتيىن - الماتىنىڭ تابيعاتىنا ءتان تىرشىلىك يەسى. الماتى شيپاجاي ايماعى رەتىندە تانىمال. قالا اتموسفەراسىن تۇرعىندارعا سايالى مەكەن رەتىندە تانيدى. ءتيىن - ەنەرگيا مەن قوزعالىستىڭ بەلگىسى. قالا تۇرعىندارى بەلسەندىلىگىمەن ەرەكشەلەنەدى. بىرەۋى ءبىر جۇمىستىڭ ىزىندە، ەندى ءبىرى ءبىر جوبانى قولعا الىپ جاتىر. توقتامايتىن قايناعان تىرشلىك. دەمەك بۇل جانۋار الماتىلىقتاردىڭ تىنىس- تىرشىلىگىنەن حابار بەرەدى»، - دەدى « FUNK  كرەاتيۆتى اگەنتتىگى» باسشىسى مايرا يزمايلوۆا.

ەكو- ارت نىسان ەۋروپادا ترەندكە اينالعان. بۇل دەگەنىمىز - ونەر شەبەرلەرى قورشاعان ورتاعا نازار سالىپ، ونداعى تىرشىلىك يەلەرىن ونەرىنە ارقاۋ ەتەدى. ولار قالا بۇرىشىنان الىپ جانۋاردىڭ ءمۇسىنىن جاساۋ ارقىلى ادامداردىڭ نازارىن وزگە تىرشلىك يەلەرىنە اۋدارۋدى ماقسات ەتەدى.

 «ينستاللياتسيانىڭ ءىشى بوس. قاڭقاسى سەيسميكالىق ءتوزىمدى تەمىردەن جاسالعان. اعاش فانەرامەن قاپتالىپ، سىرتى سابانمەن ورالعان. ساباننىڭ بولىكتەرى جەلمەن ۇشىپ كەتپەستەي ەتىپ ورالىپ، ورتتەن ساقتاۋ ءۇشىن ارنايى سۇيىقتىقتارمەن وڭدەلگەن. تۇرعىنداردى الاڭداتىپ وتىرعان ماسەلەلەلەردىڭ بارلىعى الدىن الا ويلاستىرىلعان. نىساننىڭ ورنىن اۆتوردىڭ ءوزى تاڭدادى. وسى وقيعادان كەيىن قالا تۇرعىندارى اتاكەنت كورمە كەشەنىنە نازار اۋدارا باستاعان سياقتى»، - دەيدى مايرا يزمايلوۆا.

 بۇل جوبا - مەملەكەت پەن جەكە سەرىكتەستىكتىڭ بىرلەسكەن جۇمىسى. ۇيىمداستىرۋشىلار جۇمسالعان شىعىننىڭ شاماسىن ايتا الماعانمەن، نىساننىڭ ۋاقىتشا ورناتىلعانىن اتاپ ءوتتى.

«بۇل وتە قىمبات جوبا، ونى ساتىپ الۋعا قارجى جەتكىلىكسىز. قازىرگى جاسالعان كەلىسىمشارت 9 ايعا عانا جارايدى. ودان كەيىن الىپ تاستالۋى مۇمكىن. ءبىراق الىپ جانۋار قالا تۇرعىندارىنا ۇناپ، ولاردىڭ اراسىندا قيماستىق سەزىمى ويانىپ جاتسا، اۆتورمەن اراداعى شارتتىڭ مەرزىمىن ۇزارتۋعا بولادى»، - دەپ اتاپ ءوتتى مايرا يزمايلوۆا.

جانۋار ءمۇسىنىن جاساۋعا ءبىر ايعا جۋىق ۋاقىت جۇمسالعان. جوبانى جۇزەگە اسىرۋعا 30-عا جۋىق مامان اتسالىسقان. بۇگىن سالتاناتتى تۇردە اشىلىپ، قالا تۇرعىندارىنا رەسمي تۇردە تانىستىرىلدى.

اۆتور: ارايلىم جولداسباي