بۋراباي اسپانىنىڭ استىندا «ءبىرجان - سارا» وپەراسى قويىلماق
جاۋھار تۋىندىنىڭ جاڭا مۋزىكالىق- ساحنالىق رەداكسياداعى تۇساۋكەسەرى وسى جىلدىڭ كوكتەمىندە «استانا وپەرا» ساحناسىندا ورىن الىپ، وراسان زور جەتىستىككە يە بولعان ەدى. جوبا ق ر مادەنيەت جانە سپورت مينيسترلىگىنىڭ قولداۋىمەن ەلوردانىڭ 20 -جىلدىق مەرەيتويى اياسىندا جۇزەگە اسۋدا.
«ءبىرجان - سارا» قازاق وپەرا ونەرىنىڭ ءتولتۋما جاۋھارى بولىپ تابىلادى. قويىلىمعا بارىنشا ناقتىلىق بەرىپ، قازاق جەرىنىڭ باي تابيعاتىن كورسەتۋ ءۇشىن سپەكتاكلدى سۇلۋ ولكە - بۋرابايدا قويۋعا شەشىم قابىلداندى.
قويىلىم توبىنىڭ بۇگىنگى تاڭداعى بىرەگەي شەشىمدەرى مەن سپەكتاكلدىڭ ستسەنوگرافيالىق ايشىقتارىن قوسا العانداعى بارشا دراماتۋرگيا تولىقتاي ساقتالادى. دەگەنمەن، تەاتردىڭ قىر- سىرى جاعدايعا بايلانىستى بولماق، قويىلىمداردى اشىق اسپان استىندا وتكىزۋ تاجىريبەسى جاڭا مۇمكىندىكتەرگە جول اشپاق: پارتيتۋرادا جازىلعانداي، ءبىرجان ءوز ارياسىن الىستان شىرقايدى، ورماننىڭ اكۋستيكاسى انگە ەرەكشە ايقىن رەڭك بەرەدى، ءتىپتى تابيعاتتىڭ ءوزى دەكوراتسيانىڭ ءبىر بولىگى ىسپەتتەس. بۇل كورەرمەندەرىمىزدىڭ تەاتر ساحناسىندا بۇرقىراپ اعىپ، بارشانى تامساندىرعان سارقىرامانى نە بولماسا كوزدىڭ جاۋىن الار جارمەڭكەنى كورە المايدى دەگەن ءسوز ەمەس، ءبارى دە بولادى! ءبىراق، ەڭ باستىسى - كەرەمەت مۋزىكا، سوليستەردىڭ تاماشا داۋىستارى مەن وركەستردىڭ ۇيلەسىمدى دىبىستالۋى تىڭدارمانعا ۇمىتىلماس ەرەكشە اسەر سىيلاماق.
سپەكتاكلدىڭ تۇجىرىمداماسى بارلىق كەيىپكەرلەر بەينەلەرىنىڭ ءبىرجاقتى باياندالۋىنىڭ جوقتىعىمەن سيپاتتالادى. كورەرمەن قاۋىمعا ءبىرجان مەن سارانىڭ بۇل دۇنيەدە ورىن الۋى جازباعان ماحاببات وقيعاسى ۇسىنىلادى. ءداستۇر بويىنشا، وپەرا باستى قاھارماننىڭ قازاسىمەن اياقتالادى، الايدا قويۋشىلار ءۇمىت وتىن سوندىرمەيدى، ياعني قۇرباندىققا شالىنعان ماحابباتتىڭ بەكەر بولماعانىن كورەرمەننىڭ تۇسىنگەنىن قالايدى. ءبىرجان مەن سارانىڭ وقيعاسى مىڭداعان ۇرپاقتىڭ بىرىگۋىنە مۇمكىندىك بەرىپ، حالىقتىڭ جادىندا ماحابباتتىڭ ۇلى قۇدىرەتى جايلى ەستەلىك بولىپ ماڭگىلىككە قالماق.
سپەكتاكلدىڭ باستالۋى ساعات 21.30 دا، «بۋراباي» دەمالىس ايماعى
Baq.kz
