كونكي سپورتى: قىتاي مەن رەسەي قازاقستانعا ۇسىنىس جاسادى

استانا. قازاقپارات - كونكيمەن جۇگىرۋدەن قىتاي جانە رەسەي سپورتشىلارى قازاقستانداعى ارىپتەستەرىنە ماتچتىق كەزدەسۋ فورماتىنداعى تۋرنيرلەر سەرياسىن وتكىزۋدى ۇسىنىپ وتىر، دەپ حابارلايدى قازاقپارات ءتىلشىسى.

ق ر ۇ و ك- ءنىڭ باسپا ءسوز قىزمەتى تاراتقان مالىمەتتەرگە سۇيەنسەك، جىل سايىن وتەتىن جارىسقا جاس وسپىرىمدەر مەن ۇلكەن جاستاعى جەتكىنشەكتەر قاتىسۋى ءتيىس. تۋرنيردىڭ اتاۋى - «ۇلى جىبەك جولى».

قازاقستان كونكيمەن جۇگىرۋ فەدەراتسياسى وكىلدەرىنىڭ ايتۋىنشا، اتالعان فورمات بۇرىن وتە تانىمال بولعان. «مەدەۋ» ايدىنىندا ك س ر و، گدر، نورۆەگيا قۇرامالارىنىڭ ماتچتىق كەزدەسۋى جۇيەلى تۇردە ءوتىپ تۇرعان. مادەني جانە سپورتتىق شارالاردى جاڭعىرتۋ 2018/2019-جىلعى ماۋسىمنىڭ سوڭىنا جوسپارلانۋدا. العاشقى جارىستى چەليابينسك، ەكىنشىسىن استانا قابىلدايدى. ال سوڭعى كەزدەسۋ قىتاي قالالارىنىڭ بىرىندە وتپەكشى.

ءاربىر كەزەڭدە كوماندالىق ەسەپتەگى جەڭىمپازدى انىقتاۋ ۇسىنىلۋدا. جارىس باعدارلاماسىنا جەكە قاشىقتىقتاردان بولەك، كوماندالىق سپرينت پەن كوماندالىق جارىس ەنۋى مۇمكىن.

بۇل فورمات ەكى سەبەپ بويىنشا قىزىقتى. كونكيمەن جارىسۋدا قانداي دا ءبىر جاڭا تۋرنير وتكىزۋ - كوپ كەزدەسە بەرمەيتىن وقيعا. ەكىنشى سەبەبى - ۇسىنىلعان جاس دەڭگەيى. استانا ءوز سپورتشىلارىن 2020-جىلى وتەتىن جاس وسپىرىمدەر وليمپياداسىنا دايىنداۋدى باستادى. دايىندىق كەزىندە جارىستىڭ كوپ ءوتۋى سپورتشىلارعا قوسىمشا كۇش بەرەرى ءسوزسىز.

ايتا كەتەيىك، نورۆەگيانىڭ ليللەحاممەر قالاسىندا وتكەن جاس وسپىرىمدەردىڭ قىسقى وليمپياداسىندا قازاقستاندىق سپورتشىلار ءتورت جۇلدە جەڭىپ الدى. ءتورت جۇلدەنىڭ ۇشەۋىن كونكيگە قاتىسى بار سپورتشىلار يەلەنگەن بولاتىن. ەليزابەت تۇرسىنبايەۆ مانەرلەپ سىرعاناۋدان قولا مەدال يەلەنسە، شورت-ترەك پەن كونكيدەن ارالاس كوماندالىق جارىستا سپورتشىلارىمىز جۇلدەگە قول جەتكىزدى.

اۆتور: كۇنسۇلتان وتارباي